High Court-in INC MDC-te zualkona a pawmsak
Lai Autonomous District Council (LADC) a Indian National Congress (INC) MDC-te thubuai an thehluh chungchangah Gauhati High Court (GHC), Aizawl Bench chuan tun hnai khan thutlukna siamin, LADC CEM T Zakunga chu an thil phut leh document-te kar khat chhungin District Council & Minority Affairs Secretary kaltlanga Governor hnena thlen turin a hriattir.
INC MDC-te hian INC MDC pali leh independent MLA pakhat chu Congress Legislature Party (CLP) chhuahsan a, MNF MDC-te nen United Legislature Party (ULP) an din avangin MDC aṭanga ban turin Chairman hnenah an thlen a ni. Chairman hian a ban duh loh avangin High Court- ah hian an zualko a ni.
High Court chuan CCB Rules Chapter IX para No. 11(6)(a)(b) leh (c) hnuaiah MCD pangate hi disqualify theih an ni, a ti. LADC Chairman leh Dy. Chairman chu INC MDC-te'n MDC aṭanga ban tura an phut zingah an tel avangin session kaihhruai a remtihsak tawh lo bawk a, session neih a nih chuan CEM nilai T Zakunga kaihhruai turin thutlukna a siam a ni.
District council-a MDC chungchangah hian thutlukna chu Governor siam tur a nih angin, T Zakunga chu an thil phût leh finfiahnate chu chawlhkar khat chhunga District Council & Minority Affairs Secretary kaltlanga Governor-a thlen tura tih a ni.
ADC-ah hian mipui thlan (elected) MDC 25 leh ruat (nominated) MDC pathum, an vaiin 28 an awm a; Congress sorkar T Zakunga kaihhruaia Congress MDC pali leh independent MDC pakhatte chuan tun hnai khan sorkar an thlâwpna hnûkdâwkin, MDC pariat nei MNF nen United Legislature Party (ULP) an din a ni.
ULP hian Governor hnenah MDC 13 an neih avangin sorkarna siamtir turin an ngen a, Congress lam erawh chuan elected MDC 12 bakah nominated MDC pathum nen MDC 15 an la neih avangin sorkarna an la chelh zui thei niin an sawi thung.