KHAWTHLIR

Nimina Lammuala Independence Day lawmnaah police hna thawk ṭha chawimawina dawng tura thlante puan a ni. Award dawngtu turte chu - President’s Police Medal for Disting­uished Service dawng tur Malsawma Royte, Dy.SP, CID (SB); Police Medal for Meritorious Service dawng tur Neihchungnunga, CID DG leh inspector (ministerial) Lalmuanthangi; Union Home Minister’s Medal for Excellence in Investigation dawng tur inspector Lalhmachhuani Sailo leh, Fire Service Medal for Meritorious Service dawng tur leading fireman Lalrosanga leh fireman Roluahpuia te an ni.

Mizoram UPC ṭhalai, Pentecostal Youth Department (PYD) inkhawmpui lian vawi 25-na neihna tur Hnahlan khelmualah nimin khan pandal sak ṭan a ni. Pandal sak ṭan puala inkhawm buatsaihah General PYD president upa Vanlaldinthara'n fuihna thuchah a sawi. PYD inkhawmpui lian hi September 20-22 chhungin neih tur a ni.

Tourism minister Robert Romawia Royte chuan nimin zing khan Lawngtlaia Tourist Lodge a tlawh a, buil­d­ing dinhmun a enfiah. Tourist Lodge chung lam pindanah fûr laiin tui lut thei awm thawm ṭhat a ṭul thu leh mikhual lirthei hunna tur kawt zawla dawh zau belh a ṭul thu sawi lan a nih chungchangah Minister chuan, "Mizorama tourist lodge-te thawm ṭha tura hma lak mek a ni. Mizorama hotel leh restaurant-te thianghlim, hrisel leh dawr chakawm tak vek an nih theih nan Tourism department-in hma a la dawn," a ti.

Home minister Lalchamliana chuan Nilaini tlai khan Khawzawl DC leh SP pisa a tlawh. Home Minister hian Khawzawl district-a sorkar hotute leh khawtlang hruaitute kawmin, "District tih puitlin nan mipuite leh sorkarah mi thawhhlawk tak takte an awm rualin bialtu MLA, dy. CM Pu Tawnluia'n theihtawp a chhuahna leh inpeknate hi a ropui hle a ni," a ti a, district a changtlun chhoh zel nana hmalakna hrang hrangah thawhhona ṭha tak a awm a pawimawh thu a sawi..