Duhoma'n Prime Minister a sawisel "Bill vangin ram neitu nihna kan hloh mek"

Mega Rally hi Trinamool Congress huaihawt niin, an hotunu Mamata Banerjee, West Bengal chief minister ni bawk chu a bul tumtu ber a ni a, kumina Lok Sabha inthlanpui atana inbuatsaihna a ni. Rally-ah hian India rama political leader ṭhahnem tak an tel a, Mizoram aṭangin Lalduhoma bakah, Andrew H Thangliana, MLA-te pawh an tel a ni. 

Rally-a thu sawitu Lalduhoma chuan, tun hnaia Lok Sabha-a The Citizenship (Amendment) Bill, 2016 (CAB) pass a nih avangin hmarchhak pumpui chu ram kâng ang maiin a kâng duai duai tih sawiin, CAB vangin NE mite'n ram neitu nihna an hloh mek a, ram neitu nihna thinlung put kawngah an a tlahniam nasa hle niin a sawi.

Lalduhoma chuan, prime minister Narendra Modi chu vaukhânna hrilh duh a nei tih sawiin, "He Bill hi dana siam a nih vaih chuan India ram hi keini tan chuan awm rengna tlakah kan ngai dawn lo. Chuvangin, vawiina he lai hmuna kan lo kal chhan chu, Central India-ah sorkar thar hmel thar, secular sorkar dik tak hmuh kan duh vang a ni. Bill hi hnuhkîr emaw, hmarchhak bial huamtir loh emaw kan phût a ni," a ti.

Hnam tênau, sakhaw tlem zawkte chu BJP sorkarah an him lo hle tih sawiin Duhoma chuan, "India ram ropui tak history chu an duh dan danin an ziak ṭhain an tidanglam duh a, kan mimal nunah an inrawlh a, kan ei tur leh ei loh turte min hrilh bawk," a ti a; sakhaw biakna thilah BJP chu an inrawlh ṭhin niin a sawi.

Hun rei lo te chhunga West Bengal siamṭha theitu chuan India ram pawh a siamṭha thei ang tih a ring tih sawiin Lalduhoma chuan, "India ramah hian kan hma lawkah secular sorkar kan neih ka beisei. Chutih hunah chuan NE mipuite venhim kan ni tawh ang. NE-a regional party zawng zawng, BJP nena inzawmna nei chuan an inzawmna chhu chat fai vek turin ka ngen a, hnam leh chi inthliarna do ṭheuh turin ka sáwm a ni," a ti.

Mega Rally-ah hian mi nuai 40 vel an kal khawm a, India rama political party hrang hrang hruaitute'n thu an sawi a ni.