Parking fee collector pakhatin nuai 71 a bá
Rangvamuala Ch. Saprawnga Truck Terminal-a parking fee khawntu chuan Aizawl Municipal Corporation (AMC)-ah parking fee, a pung nen cheng nuai 71 chuang a ba mek a, AMC-in ṭum eng emaw zat ṭhíng tawh mah se, an la ṭhíng chhuak thei lo.
Vanglaini-in RTI Act hmanga a zawhna, AMC SPIO-in a chhan danin, Ch. Saprawnga Truck Terminal (CSTT)-a parking fee khawn hna chu Vanlalchhungi, Venghlui hnenah tender a chhanna angin kum 2017-18 chhunga enkawl turin pek a ni. December 5, 2018 thlenga AMC-a parking fee a thehluh tur leh a pung zawng zawng a bat zat chu Rs. 71,53,879 a ni a; chu'ng pawisate chu AMC chuan vawi 11 an ṭhíng tawh a, tun thlengin Vanlalchhungi'n a la pe lo.
Parking fee collector Vanlalchhungi hi AMC office dawr tur pawhin a kal ngai lo a, a aiawhtu atan T Lalengthanga, Dawrpui Vengthar leh T Liansiama, Venghlui te a tír ṭhin.
Vanglaini palai zawhna chhangin AMC hotute chuan, parking fee khawntu dang zingah sum tam tham lutuk bá leh AMC-in a ṭhìn ngai an awm ngai loh thu te, parking fee chu thla thar ni 10 ral hmain a thla hmasa zelah an pe tur a nih thu an sawi a, "AMC-a an pek tur hi a hun taka an pek luh loh chuan, dân angin parking fee chu ni khatah 0.50%-in a pung ṭhin," an ti.
Ch. Saprawnga Truck Terminal-a parking fee collector Vanlalchhungi'n a tìra a pawisa a thehluh tur chu Rs. 2,50,000 a ni a; collector hian a tam a tih vanga a ngen angin a hnuah AMC chuan Rs. 2,20,000-ah an tihhniamsak. AMC-in an tihhniamsak tawh chung pawhin Vanlalchhungi chuan parking fee a thehluh turte a thehluh loh avangin Dec. 5, 2018 thlenga a bat zawng zawng chu a pung nen nuai 71 a chuang tawh a ni.
AMC hotute chuan, Ch. Saprawnga Truck Terminal-a parking fee khawn chu a khawntuin a chawlhsan hnuah thla sarih vel zet chu AMC-in an khawn tawh thu leh, thla khatah Rs. 3,00,000 vel an hmuh chhuah theih thu an sawi. AMC hian parking fee khawnna hmun hrang hrangah a nei mek a, kum khatah cheng nuai 50 vel an beisei laiin, tunah hian cheng nuai 40 vel an dawn phah niin an sawi bawk.