SEDP hnuaiah thawk rimte tan lo chuan Dinchhuahna tur a awm lo - Dr K Beichhua

Siaha bialtu MLA Dr K Beichhua, minister of state chuan January 19, Inrinni khan a biala khaw hrang hrang a tlawh a; sorkar tharin a kalpui tur SEDP hnuaiah thawkrimte tan lo chuan dinchhuahna a awm loh thu a sawi.

Inthlan a zawh tawh avangin political party tih bik nei loin, ram hma­sawnna atan lungrual taka thawh a pawimawh thu sawiin K Beichhua chuan, "Sorkar tharin SEDP a kalpui turah pawh thawkrim mite tan lo chuan din khaw chhuahna tur a awm lo. He hamṭhatna dawng pha ve tur hian taima taka thawh ṭheuh i tum ang u," a ti.

Dr K Beichhua chuan Amotlah khuaa MTP-te'n zâwn an tum chu a hnar a, a hnar chhan sawifiahin, "In lal ni turin min thlang lo a, in chhiahhlawh, in tana hna thawk turin min thlang a ni," a ti a; tumah ropui bik awm lo a, intluk tlang vek an nih thu a sawi.

Thil ṭha tih kawngah zâm loa a kal zel tur thu sawiin Dr K Beichhua chuan, "In mi ṭawngṭai­puina ka ngen a ni. Chief Minister-in a thil ngaih pawimawh ber pathum zinga mi - kan ṭhalaite nunna suattu leh hmeithai leh fahraha mi tam tak siamtu ruihhlo do kawngah a sûlsutu ni turin Excise & Narcotics department enkawl turin min thlang a, ruihhlo bawiha táng mekte chhanchhuah leh chhawmdawl hna thawk thei turin Social Welfare department ka chang bawk a ni," a ti.