Tuirini Hydel Project tuikhuah vanga harsatna awm thei sutkian dan sawiho

Power & Electricity minister R Lalzirliana hoin January 19, Inrinni khan Tuirini Hydel Project siam a nih dawn avanga tuikhuahin Tualbunga ram neitute tana harsatna awm thei sutkian dan tur Tualbung V/C Hall-ah sawiho a ni.

R Lalzirliana chuan, Tualbung khawtlangin Mizoram kawlphetha mamawhna pung zel phuhru tura sorkar hmalakna dodal loa phal taka ram an hmantir chu lawmawm a tih thu a sawi a, "Mihringte hi inmamawh tawn vek kan nih avangin, tunah Mizoram sorkarin in ram hman a mamawh ang hian, he khua hian hmasawnna kawng a zawhna hrang hrangah kawphetha siam chhuah tur mamawhna pawh a nasa hle dawn a, chungahte chuan kan la ṭangkaipui dawn a ni," a ti. 

P&E Engineer-in-Chief pawhin thu sawiin, Tuirini Hydel Project hlawhtlinna atana sorkar hmalakna hrang hrangte a sawi. Tualbung V/C President, MUP, MHIP leh YMA hruaitute chuan  project kalpui a nih theihna tura ram hman phalna ziakin P&E E-in-C an pe nghal a ni.

Tuirini Hydel Project hi kawlphetha megawatt 24 pe chhuak thei tur a ruahman a ni a, kum li leh a chanve chhunga siam zawh tur niin, a siamna atancheng vbc. 465  ruahman a ni. Hydel project siamna atan hian BRICS aṭangin cheng vbc. 335 dil a ni a, a bak zawng chu Ministry of New & Renewable Engery leh Mizoram sorkarin an tum ang.

Project hian Khanpui, Lailak, Saitual, Keifang, Thingsulthliah, Seling, Sesawng leh Tualbung khuaa V/C pass leh periodic pata 185 a huam dawn a; hectare 380-a zau niin, heng khua aṭangte hian ram hman phalna lak vek tawh a ni.