Tlabung-in RD Block an la beisei zel

Tlabunga V/C leh pawl hrang hrangte din - Tlabung RD Block Demand Committee hruaitute chu January 19, Inrinni khan YMA Rûnah an thukhawm a, an thil phût a hlawhtlin theih nan theihtawp chhuah chhunzawm zel an tum thu an puang.

TRDBDC hi Tlabung RD Block a pian theih nana hma la tura V/C leh tlawmngai pawl hruaitu kalkhawmte'n an din a ni a; Inrinnia an meeting-ah hian, kum liam taah Tlabung RD Block a pian theih nan theihtawp chhuahin hma la mah se, an thil phût tihhlawhtlin a ni ta lo chu pawi an tih thu te, Tlabungah RD Block headquarters thar hawn a nih ngei theihna tura hma lak chhunzawm zel ṭha an tih thute an sawi a ni.

TRDBDC hruaitute chuan, Mizoram leh Mizo hnam a him theihna turin Tlabung leh a chhehvel khuate tihhmasâwn a ngai tih sawi nawnin, "Ngaihthah leh hnuchhawn kan nih ṭhin avangin khaw tam tak rauhsan a ni a, heng avang hian Mizo luah chin ram a zîm tial tial a ni," an ti a; tun anga ngaihthah an nih zel chuan khawpui leh hmun lailia nasa taka hmalakna ringawtin awmzia a nei dawn loa an hriat thu an sawi.

Tun hnaiah Mizo hnam pum ṭanrualna leh harh tharna a thleng chu lawmawm an tih thu sawiin, "Hmun laili leh khaw lian zawkah hnam anga kan ṭanrual bakah, kan inpumkhatna a nghet tial tial tih a lang mek a, hei hian keini ramria awm Mizote thla a timuang tak zet a ni," an ti a; ram leh hnam humhalhna ni tel tura an ngaih RD Block an dilna kawngah beiseina sang tak a neihtir thu an sawi bawk.