South-I chhunga hnathawhte enfiah

Aizawl South-I bialtu MLA C Lalsawivunga chuan January 19, Inrinni khan a bial chhunga sorkarin hmasawnna hna hrang hrang a thawh mekte a enfiah bakah, bial chhung veng hrang hranga ruahmanna awm thei turte a en a; Aizawl South-I hmasawnna turin MNF kaihhruai sorkar nen ṭha taka an thawhho a beisei thu a sawi.

C Lalsawivunga hian Upper Republic péngṭhuam, College Veng panna PWD department-in blacktopping hna an thawh mek te, UDPA department-in retainning wall metre 52-a thui leh meter 6 chuanga sang an siam te, Upper Republic leh Governor Southgate inkar kawng zauh dan turte a enfiah a ni.

Upper Republic leh Governor Southgate inkar kawng chungchangah, tuna kawngpui kual lai chu a chhak metre 10 vel aṭanga ráwt hniamin, a kual tihzauh tum a ni dawn a; a ṭul angin PWD-in project siam se, financial year thara hman theih turin ṭul leh mamawhte sorkarah thlen dan turte an rel a ni.

Aizawl South-I MLA chuan Thanglaikawn Road, Upper Republic vengchung aṭanga venghlun panna kawng te, College Veng thlanmual kawng blacktop hna thawhte a tlawh bawk.

C Lalsawivunga chuan, an bial hmasawnna hna thawh mek leh la thawh zel turah chief minister Zoramthanga kaihhruai MNF sorkar nen inpawh leh ṭha taka an thawhho a beisei thu sawiin, "Aizawl South-I hmasawnna leh bial mamawh dil kawngah pawh Aizawl South-I mipuite kan sorkar lakah kan pangchang viau dawn a, sorkar pawhin inenhranna tel loin, opposition bial ni mah se, hmasawnna atan chuan ṭha takin min dawng sawng ang tih ka ring nghet tlat a ni," a ti.