KHAWTHLIR

Inrinni khan Bungkawn Bial KṬP chuan Aizawl Civil Hospital tan thisen unit 56 an pe a, a petute mipa 48 leh hmeichhia pariat an ni a; Lungleng Bial KṬP pawhin Samtlang Kohhran Hall-ah blood donation camp huaihawtin, Civil Hospital tan unit 55 an pe a, a petute mipa 47 leh hmeichhia pariat an ni. Ramhlun Branch KṬP chuan Synod Hospital tan unit 38 an pe a, a petute mipa 32 leh hmeichhia paruk an ni.

Pumpui cancer vanga New Delhi-a enkawl mek deputy chief minister Tawnluia chu nimin khan Meghalaya chief minister Conrad K Sangma chuan a kan a, dam ṭha leh vat turin duhsakna a hlan. Tawnluia hi Max Hospital-ah chemotherapy vawi khat khaisak a ni tawh a, January 25 hian khaisak leh a ni ang.

Sports & Youth Services minister Robert Romawia Royte chuan January 18, 2019 khan New Delhi-ah Civil Aviation secretary RN Choubey a kâwm a, February 10, 2019 aṭanga Jet Airlines-te'n Mizorama an service an tihtawp tur chungchanga hmalak dan tur a sawipui a, hmalak pui turin a ngen. 

Mizorama sumdawng hlun zinga mi RTP Enterprise neitu Rothangpuia (87) h/o Lalthangi, Tuikual South chu Inrinni zan dar 10:15 khan Kolkata-ah pneumonia avangin a thi a, vawiinah vui a ni ang.

PRISM party chuan thuchhuah siamin, Rajya Sabha Chairman hnenah The Citizenship (Amendment) Bill, 2016 chu Rajya Sabha-a pharh lo tura ngenna an thlen dawn tih an tarlang a; Republic Day-ah a remchan dan angin Bill duh lohna lantir turin ruahmanna an siam thu an tarlang bawk.

Lungleia District Agriculture Office chuan Inrinni zing khan Agriculture department pisa tualah Zawlpuia lo neitute chana thar hralh chhuahna rûnpui an buatsaih a, Lunglei District MJA president H Lalthansanga'n a hmanpui. H Lalthansanga chuan, kut hnathawktute thlai thar chhuah hralhna kawnga department-te'n hma an la chu lawmawm a tih thu a sawi.