Vawk natna hlauhawm African Swine Fever Myanmar-ah lêng - Mizorama luh hlauhawm

AH&Vety department chuan, ASF chu Mizoramah a rawn thlen lohna atana hmalak tawh dan leh hmalak zel dan tur an sawiho a; vawk leh vawksa aṭanga siam ei tur reng reng la lut lo turin Mizo mipui an ngen. Meeting-a tarlan danin, ASF chu Mizoramah a lo luh chuan, Mizorama ran vulhte thi mang vek palh thei dinhmunah an ding dawn. ASF chu natna inkai chhâwn awlsam tak a ni a, a venna leh a enkawlna damdawi a awm lo. Invên theihna awmchhun chu ram dang aṭanga vawk leh vawksa aṭanga thil siam ei tur reng reng lak luh loh a ni.

Ram dang aṭanga vawk lak luh sorkarin a khap reng chungin la lut lui an awm reng tih tarlangin AH&Vety chuan, "A rûka vawk la lut ṭhinte hi sorkar hmalakna ang ringawt chuan vên hneh tak tak a harsa hle a, hma min lakpui turin mipui ṭawiawmna kan ngen tak meuh a ni. Kan rama thil pawi thlen thei ti lui tlatte hi kan hria a nih chuan a rang thei ang berin thuneitute hnena thlen ni se," an ti.

AH&Vety department chuan, PRRS vangin Mizorama vawkte an thi mek zel tih tarlangin, "ASF hi kan ramah a lo lut leh a nih ngat chuan kan vawkte an thi mang thei hial dawn a ni," an ti a; Mizoramah ASF a luh loh nan ṭanhopuiah Mizo mipui an sáwm a ni.

Myanmar rama African Swine Fever a lên thu hi World Organization for Animal Health chuan August 14, 2019 khan an puang a, mahse, Myanmar-a khaw pakhat Keng Tung-ah chuan kumin August 1 khan hmuh a ni tawh. Keng Tung-ah hian vawk 65 zinga 15 chu ASF an kai tih hmuh chhuah a ni a, ASF kai vawk 15 zinga 12 chu an thi tawh a ni.