Khawpui Fai Intihsiakna Dy. CM-in a hawng

Deputy chief minister Tawnluia, Urban Development & Poverty Alleviation department changtu chuan nimin khan a inah UDPA department buatsaih Mizoram Khawpui Fai Intihsiakna 2019 chu a hawng.

Tawnluia chuan, faina lama inelna chu lawmawm a tih thu sawiin, kum 2017-a tih ṭan a nih hnuah hmasawnna a takin hmuh tur a awm thu a sawi a; Mizorama khawpui, census town 23-te chu intihsiakna turah kum hmasa aia hma sawn ṭheuh tura duhsakna hlanin, "Lawmman dawn theih hi a ṭha a, mahse, a pawimawh zawk chu, mipui thinlungah faina leh thianghlimna tuh a, eng lai pawha fai hi a ni," a ti.

Mizoram Khawpui Fai Intihsiakna hi UDPA department hmalaknain Mizoram Sanitation Task Force hnuaiah Mizorama census town 23-ah kalpui a ni dawn a, khaw­puite chu category pahnihah ṭhen a ni. Category-I ah district headquarters pariat (district thar pathum tel loin) - Aizawl, Lunglei, Siaha, Champhai, Kolasib, Serchhip, Lawngtlai leh Mamit an awm.

Category-II ah khawpui dang zawng - Saitual, Khawzawl, Hnahthial, Vairengte, Tlabung, Kawnpui, Thenzawl, N. Vanlaiphai, Darlawn, Zawlnuam, Biate, Khawhai, Sairang, Lengpui leh Bairabi-te an awm. Category pahnihah hian pakhatnate'n Rs. 1,00,000 ve ve, pahnihnate'n Rs. 80,000 ve ve leh pathumnate'n Rs. 40,000 ve ve an dawng dawn a; category pahnih belhkhawmin khawpui fai ber Overall Cleanest Town puan a ni ang a, khawpui fai ber chuan Rs. 1,00,000 dang an dawng bawk ang.

Khawpui Fai Intihsiakna hi kum 2017-ah ṭan a ni a, Biate chu kum 2017 leh 2018-ah khawpui fai berah thlan a ni ve ve a ni. UDPA Minister Tawn­luia chuan, Mizoram leh khawpuite faina leh thianghlimna kawngah sorkar department hmalakna ringawt a tâwk lo tih sawiin, "Khaw­puia mi zawng zawng an pawimawh. Thatho leh phûr taka kan ṭan tlan a ngai dawn a, a hlawhtlinna chu hmalak zui zelnaah a innghat dawn a ni," a ti.

Tawnluia chuan, khawpui fai intihsiakna result chu October 2-ah puan a nih dawn avangin, tun aṭangin thla khat leh a chanve vel la awmah theih­tawp chhuah turin khawpui 23 mipuite a sáwm. Deputy CM Tawnluia chuan nimina inkhawmah Cleanliness Competition 2019 Guidelines bu a tlangzarh a, Guidelines-ah hian tih tur ruahmanna leh endikna tehfungte tarlan a ni. Khawpui fai intihsiaknaah hian khaw tinah zirna in, sorkar pisa, damdawi-in, hotel-te leh khawlaite endik a ni ang.

UDPA secretary Dr C Vanlalramsanga chuan, kum 1977 aṭangin Mahatma Gandhi pian champha denchhenin Faina Hapta (Cleanliness Week) hman ṭan a nih thu sawiin, Mizoram chu faina lamah India rama state-te zingah hmahruaitu a nih thu a sawi a; intihsiak buatsaih a nih chhan sawiin, "Inelna buatsaih a nih hian khawpui tinin faina lamah nasa takin ṭan an lak phah a, khaw dangte hmalak dan kan hriat theih phah a, khaw dangte tih dan ṭha kan tih ve theih phah a ni," a ti.

Dr C Vanlalramsanga chuan, Mizoram chu faina lamah India ram state zingah hma la ṭhate zinga mi a nih thu a sawi rualin, "Solid waste management (bawlhhlawh sawngbawl) lamah erawh chuan kan la hniam hle," a ti a; Aizawl bawlhhlawh sawngbawlna tur buaipui mek chu October thla aṭangin a taka hman tum a nih thu leh, solid waste management chu Lunglei leh Kolasib-ah pawh kalpui tum a nih thu a sawi bawk.