KHAWTHLIR

Champhai Ṭhalai Pawl (CṬP) chuan, Champhai damdawi-ina solar plant siamṭha tura vawi li an ngen hnua sorkar aṭanga chhànna an hmuh chungchangah thu­chhuah siamin, "ZEDA-in solar plant siamna atan Rs. 3,30,792 chauh sên a ngaih thu sorkara an thlen hi a lawmawm. Solar plant hi August 2019 chhung ngeia siam ṭhat kan phût a, hmalakna kan hmu lo a nih chuan kan remhriat angin hma kan la dawn a, eng pawh thleng se mawh kan phur lo ang," an ti.

Sports & Youth Services department leh Tourim department minister Robert Romawia Royte chuan nimin khan Lunglei DSYO pisa, Lunglei Zotlanga Tourist Lodge panna kawngpui tlahniam leh Thenzawl leh a chhehvela Tourism department hmalaknate a tlawh. Robert Romawia chuan, Lungleia NCC Mixed Battalion din turin Cabinet-in kumin kum tìr khan thutlukna a siam tawh thu a sawi.

Women's Polytechnic, Durtlang chuan nimin khan an college auditorium-ah Freshers' Social an hmang a, Higher & Technical Education (HTE) minister Dr R Lalthangliana'n a hmanpui. Minister hian Wo­men's Polytechnic annual magazine 'Ṭhadang' tih a tlangzarh. Women's Polytechnic hi kum 1998-a din a ni a, mi 800 zir chhuak tawhin, hmun hrang hrangah eizawnna ṭha tak tak an nei hlawm a, Mizoram pawna hna thawk eng emaw zat an awm. Kuminah zirlai 219 leh zirtirtu 29 an awm mek.

YMA Sub-Hqrs, Ser­chhip chuan kumin ruahtui tla vanga YMA branch hrang hranga chhiatna tâwkte ṭanpuina atana YMA branch 28-ah vehbûr an khawn a, YMA branch 17 aṭangin Rs. 2,23,655 a lut tawh.

Baptist Higher Secon­dary School NSS unit chuan nimin khan Christian Hospital, Serkawn tan thisen unit 74 an pe a, a petute hmeichhia 38 leh mipa 36 an ni. ṬKP, Serkawn Bial pawhin nimin khan blood donation camp an huaihawt a, Lunglei Civil Hospital tan thisen unit 18 an pe a, a petute mipa 14 leh hmeichhia pali an ni.