LAD-in sum pek loh chhan a sawifiah

Sorkar laipuiin Mizoram sorkar hnena excluded area fund cheng nuai 4,544 a pek chungchangah Local Administration depart­ment (LAD) chuan thuchhuah a siam a; sum hmuh zawng zawng aṭanga 40% chu DLAO-te account-ah thun a ni tawh a, 60% dang pawh pe chhuak turin sorkar an dil mek thu an tarlang.

LAD tarlan danin, sorkar laipui aṭanga excluded area fund hmuh cheng nuai 4,544 aṭanga DLAO-te account-a dah tawh zat 40% chu cheng nuai 1,817.59 a ni a, village council-te account-a thun turin tihfel mek a ni.

Excluded area fund chu Indian Constitu­tion Part IX leh IXA-in a huam loh Mizorama V/C-te tan sorkar laipuia Ministry of Finance-in November 8, 2017-ah a pe chhuak (sanction). Sum dawngtu tur a chian mai loh avangin Mizoram sorkar LAD chuan Ministry of Finance-ah a zawtfiah a, Ministry of Finance chuan Mizorama 6th Schedule páwna V/C-te chanpual a nih thu a tichiang a ni.

Chief Secretary kaihhruainain High Level Committee-in sum sem dan tur a rél a, LAD lamin sanction a dil a, mahse, Mizoramah MLA inthlan leh MP inthlan avangin excluded area grant sum hmuh tawh chu khawih chêt theih loha dah a ni. Sanction hmuh a nih hnuah bill chu March 5, 2019-ah Treasury-ah thehluh a ni a; Treasury-in sum tam tham a pass mai thei si lo a, sorkar kum tawp nen a innan avangin March 30, 2019-ah K-Deposit ah dah leh rih a ni.

LAD chuan, "Excluded area grant hmang turin V/C-te chuan Gram Sabha koin hna thawh tur an thlan a ngai a, chu chu a hmunah DLAO-te'n an en vek hnuah department-in a thlir ve leh a. Hnate hi V/C zawng zawng huap a nih avangin en fel chhung pawh a rei lo thei lo a, en fel tawhte chu technical sanction leh administrative approval pek tura buatsaih a ni," a ti.