HTE Minister-in college a tlawh kual

Higher & Technical Education (HTE) minister Dr R Lalthangliana chuan, hrilh lâwk loin nimin khan Aizawla college pali - Government Aizawl College, Hrangbana College, Aizawl North College leh J Thankima College-te leh, Durtlanga Zirtiri Residential Science College hmun tharte a tlawh.

Minister Dr R Lalthangliana hian college a tlawhnaah hian college building chhungah IQAC, NCC room hmunhma buatsaih leh sak mekte a enfiah a; zirtirtute awmna te, class room leh hmun pawimawh dangte a tlawh bawk. 

College ṭhenkhata zirlaite tâwt lutuk leh class room pakhata inhnawh tam lutukna  hmuna sawite leh college building-a him lo lai nia ngaihte a endik nghal.

Govt. Aizawl College-ah zirlai 1,280 leh zirtirtu 62 an awm mek a; an college building chu AMC-in building him leh him lo a zirchian zinga mi a ni. Hrangbana College-ah Arts leh Commerce awmin, zirlai 1,810 an awm a; zirtirtu - professor pahnih, associate professor 41, assistant professor 10 leh a nghet loa thawk 13 an awm mek.

J Thankima College, Bawng­kawn Brigade Vengah zirlai 590 an awm mek a, Aizawl North College, Ramhlun North-ah zirlai 1,280 an lut mek. Zirtiri RSC campus tharah hian building block-I, library, mipa hostel leh hmeichhe hostel building, laboratory building-te a awm tawh a, mahse luah theiha peih a la ni lo. Zirtiri College hian zirlai 635 an nei mek a, Ramthar Vengah zirna an la chhunzawm mek a ni.