Citizenship (Amendment) Bill dodalin Hmun hrang hrangah kawngzawh a ni
Mizo Zirlai Pawl (MZP) chuan The Citizenship (Amendment) Bill, 2016 (CAB) an duh lohzia lantirna leh dodalna lantirna atan nimin khan Aizawl leh Mizoram hmun hrang hrangah 'Hnam chhanna kawng zawh' an huaihawt a, mipui ṭhahnem tak an tel. Resolution an siamah, CAB chu tihtawp an phût thu an puang a; prime minister Narendra Modi leh Home minister Rajnath Singh-te lim (thlalak) an hâl bawk.
Kawngzawh hi Aizawlah chuan chawhma dar 11-ah ṭan a ni a, hmun pahnih - Zarkawt kâwn leh Khatla kâwn aṭanga zawh ṭan niin, Vanapa Hall-ah an intâwk khawm a ni. Zirlai, sikul naupangte leh college zirlaite ṭhahnem tak an tel a, mi sing khat an chuanga ngaih a ni.
Kawngzawh bul ṭannaah te, kawng lakahte leh a tawpna Vanapa Hall kawta thusawitu MZP president L. Ramdinliana chuan ram leh hnam chhan a ngaih avangin vawiin niah ram tan ke an pen chhuak ta an nih thu sawiin, "He bill hi Mizoram tana a hlauhawm bik nachhan chu chhim lama Chakma foreigner sing thum chuang awm mekte hi bill hi passed a nih chuan Mizoram khua leh tui nihna pek an ni nghal dawn a, Mizo ṭhalaite'n chanvo an neihte chu chuhpui an ni dawn. He bill Hindu lal ram siam tumna a nih avangin Kristian te tan a hlauhawm hle," a ti.
MZP President chuan he bill duh lohna leh dodalin kum 2017 aṭangin he bill zirchiang tura committee dinte an hmuh tawh thu sawiin, "Mizoram dinhmun hrechianga rawn tlawh tura kan ngenna chu tun thlengin an la ti hlawhtling lo. Mizoram tlawh miah lovin he bill zirtute hian January 7 khan Parliament-ah an thehlut a, an zirchianna an thehluh ah hian Mizo te'n an dodal ve na pakhatmah a chuang lo," a ti a, Mizo mipuite duh dan ni loa passed a nih chuan Mizo mipuite'n Independent sual leh an hreh lo tih India sorkarin hria se a duh thu a sawi.
MZP President bakah hian tlawmngai pawl dang hruaitute leh political party aiawh ṭhenkhatte'n thu an sawi. Vanapa Hall kawtah hian prime minister Narendra Modi leh Home minister Rajnath Singh-te lim (thlalak) hal a ni.
Thu dawn danin, 'Hnam chhanna kawng zawh' hi district khawpui tin deuh thawah neih a ni a, khaw dang eng emaw zatah neih a ni bawk. Siahaah erawh chuan tun kar Inrinniah kawngzawh an tum thung. Khaw tam takah chuan kawng zawhnaah hian zirlai naupang tê tête pawh an tel a ni.
Aizawla kawngzawh resolution
1. Foreigner lakah Zoram humhim turin Zofa mipui zawng zawngte hian theihtawp kan chhuah zel dawn.
2. Citizenship (Amendment) Bill, 2016 hi North East tan a him loh avangin India hian Bill hi hnâwl rawh se.
3. India ramin Citizenship (Amendment) Bill, 2016 hi a hmang a nih chuan India hian North East mipuite aiin foreigner-te a thlang zawkah kan ngai ang.
4. India hian Mizo fate au-aw a ngaithla duh lo a nih chuan Zo fate kan awm mai mai lo ang tih kan puang e.