NGO-te'n Republic Day boycott dawn Sorkarin boycott lo turin a ngen

Home minister Lal­chamliana chuan nimin khan Secretariat con­ference hall-ah NGO Coordination Committee (Joint) hruaitute a kâwm a, kumin January 26-a Republic Day hman tur chu 'boycott' lo turin a ngen. Meeting zawhah Joint NGO hruaitute chu Central YMA pisaah an ṭhukhawm a, Republic Day boycott tura thuthlukna an siam tawh chu kaltlangpui an rêl.

The Citizenship (Amendment) Bill, 2016 (CAB) duh loh vanga NGO-te'n Republic Day boycott an tum tih an hriatin chief minister Zoramthanga nen an inbiak nghal thu sawiin Lalchamliana chuan, "CM-in NGO hruaitute kâwm a, Republic Day boycott lo tura ngen turin mi ti a. Ram tana thil ṭha duh vek kan ni a, NGO hruaitute nen inkâwm ila, sâwtna a awm mahna tiin meeting hi koh a ni," a ti.

Home Minister chuan, Mizo­rama political party leh NGO-te chu CAB duh loh chungchangah an inlungrual nia sawiin, "He Bill hian hmarchhak a nghawng nasa dawn bik a. Chuvangin, CM pawhin Prime Minister leh Home Minister hnen­ah Bill hi Mizoram sorkarin a duh loh thu a hrilh tawh a ni," a ti a; Mizoram sorkar chuan Republic Day, India hunpui pawimawh tak chu boycott ni lo se a duh thu a sawi.

A mimal ngaihdan chuan, thil boycott chu democratic right nia a hriat thu sawiin Lalchamliana chuan, "Boycott hi kaltlangpui a nih pawhin indang buai ang zawng chuan tih loh hram ni se kan duh. Governor, minister, MLA leh sorkar hnathawkte hian India Constitution hnuaiah Republic Day-ah hian tih tur an nei ve a ni. In ngaihtuahna hmang turin ka ngen a che u," a ti.

Home secretary Lalnunmawia Chuaungo chuan, June 2018 khan Assembly House-ah MLA-te'n CAB an duh loh thu lungrual taka an pass tawh thu sawiin, "Resolution pawh sorkar laipuiah August 2018 khan thawn a ni tawh," a ti a; Mizoram sorkar thar pawhin Cabinet hmasa berah CAB an duh loh thu leh Rajya Sabha-a a tlang lohna atana hmalak ni se, tia an pawm thu a sawi.

Home Secretary sawi danin, Mizoram sorkarin CAB a duh loh thu hi Chief Minister-in Prime Minister leh Union Home Minister hnenah a thlen tawh a ni. Chief Minister-in Bill an duh loh thu a thlen hnuah, Home Minis­ter-in official-te kokhawmin, Zoram­thanga leh Meghalaya Chief Minister a ko leh a, hemi ṭum chuan Mizoram sorkarin Bill a duh loh thu Chief Minister-in chiang takin a thlen a ni.

Republic Day chu India mi zawng zawng ta a nih thu sawiin Lalnunmawia Chuaungo chuan, "Kan protest ber chu sorkar laipui a ni a, Republic Day hi sorkar laipui ta a ni. Chuvangin, tu pawh sorkar se, Republic Day hi mi zawng zawng ta a ni a, kan ta pawh a ni," a ti. 

NGO Coordination Committee chairman Vanlalruata chuan, CAB an duh loh thu chu Prime Minister, Union Home Minister leh Bill zir chiangtu Committee hnenah an thlen tawh tih sawiin, "An kal zel danin min timangang a, kan aw an hriat ve ngei tura tih ve a ngaiin kan hria a ni," a ti a; innawr zawng leh buaina siam zawnga Republic Day boycott an duh bik loh thu a sawi.

Home Minister hi Home sec­re­tary Lalnunmawia Chuango bakah, Home additional secretary Lal­biakzama, DIG Lalbiakthanga Pachuau, Aizawl DC aiawh leh offi­cial dangte'n an ṭawiawm a ni.