ZPM leh Congress hotute an inbia Thu chiang a la awm lo - Duhoma

Zoram Peoples' Move­ment (ZPM) Legislature Party leader Lalduhoma chuan, kumina Lok Sabha inthlan leh Assembly bye-election neih turah Congress party nena thawh dun leh thawh dun loh chungchangah thu chiang a awm loh thu a sawi rualin, inbiakna erawh a awm thu a sawi.

Lalduhoma hian nimin khan an pawl pisaah thu­thar thehdarhtute a kâwm a; Lok Sabha inthlan leh Aizawl West-I Assembly bye-election-ah Congress party nen an thawhho dawn leh dawn loh zawhna chhangin, "Tum leh tum loh a awm lo. National level-ah chuan BJP ni lo zawng ṭan rual kan tum; kan hotute an inbe mek a, an inbiak dan a zir a ni," a ti. 

ZPM Legislature Par­ty Leader chuan Janua­ry 19, 2019-a Kolkata-a United India Rally (Mega Rally)-a an hun hman dan sawiin, "Rally hi a hlawhtling hle a, India rama rally mipui punkhawm tamna ber a la ni. He rally-a telte hian United India siamin, Central-a sorkar siamho turin BJP ni lo zawngte thawhho zel kan tum," a ti a; Rally-ah chuan amah bakah India rama political party lian tak tak hruaitu mi 23-in thu an sawi tih a sawi.

United India Rally-ah chuan tuna India ramin a buaipui mek, The Citizenship (Amendment) Bill, 2016 (CAB) chu hnawhdawh emaw, India hmarchhak bial huamtir loh emaw an remti tih sawiin Duhoma chuan, "Nimin (January 22) khan Malda, West Bengal-ah BJP president Amit Shah chuan CAB kaltlangpui an tum thu uar takin a la sawi a, heti taka dodalna a awm chunga kaltlangpui an tum hi a pawi hle. Pass a nih loh nan theihtawp kan chhuah zel dawn a ni," a ti.

Lalduhoma chuan, ZPM chu United India Movement (UIM)-ah an tel ve tak avangin national politics-ah hmun laili an chang chho zel tawh dawn nia sawiin, "CAB vang hian UIM-ah Mizote kan tel ve ngei a ṭul. West Bengal chief minister Pi Mamata Banerjee pawhin kan harsatna min hriat chianpui a, sutkiansak min tiam a, ZPM leh Trinamool Congress (TMC) hian thawhho zel kan tum," a ti a; UIM-a telte chu thawkho vek tur an nih thu leh Congress party-te nen pawha thawkho tur an nih thu a sawi. 

Lok Sabha inthlan turah ZPM-in MP an neih ngei a pawimawh thu leh Mamata Banerjee emaw, Rahul Gandhi emaw chu prime minister tura rinkai ber an nih mek thu sawiin Duhoma chuan, "ZPM-in MP kan neih a, Central-a kan sorkar chuan kan MP chu minister a nih ngei kan ring, huai takin ka sawi ngam a ni. MP candidate turin mi ṭha, Central-a minister tlak tur kan zawng mek a ni," a ti.

Lalduhoma chuan, Serampore College pawh an tlawh tih sawiin, "He College hi BJP-te'n an ngaitheilo hle. West Bengal sorkar hnuaiah an la him hram hram a ni," a ti a; West Bengal CM-in an harsatna sutkiansak a tiam niin a sawi.

ZPM Legislature Party Leader chuan, UIM anga an hmachhawp hmasa chu a huhoa Delhi-a kal a nih thu sawiin, "Lok Sabha inthlan lo awm turah EVM hmang lo tura ngen kan tum. Tun hnaiah EVM rigged theih a nihzia puanzar a ni a, chuvangin inthlan awm turah hian EVM hman loh kan duh a ni," a ti.

Zawhna chhangin ZPM Leader chuan, NGO Coordination Committee-in CAB duh lohzia lantirna leh dodalna atana Republic Day boycott tura rua­hmanna an siam chu an titlang a nih chuan ZPM-in an thlawp tur thu a sawi a, "Republic Day boycott tuim hi zaa zain kan thlâwp a, keini chu kan kal lo ang," a ti.

United India Rally-ah hian India rama politician langsar tak tak an tel a; W. Bengal CM Mamata Banerjee (TMC), PM hlui HD Deve Gowda (JDS), Karnataka CM HD Kumaraswamy (JDS), Andhra Pradesh CM N Chandrababu Naidu (Telegu Desam), Delhi CM Arvind Keshriwal (AAP), BJP Cabinet minister hlui pahnih - Arun Shourie leh Yashwant Sinha, Arunachal CM hlui Gegong Apang, Union minister hlui Sharad Pawar (NCP), MK Stalin (DMK), Akhilesh Yadav (SP), J&K CM hlui pahnih Farong Abdullah leh Omar Abdullah-te pawh an tel a ni.