Scrub typhus vangin mi 42 an thi tawh

Tun hnaia Thenzawl leh Buangpui khua vela rannung seh natna (scrub typhus) leng chungchang chu nimin khan Health Services hnuaia programme officer-te'n principal director Dr F Lallianhlira pisaah an sawiho a; he natna chungchanga Health department hmalaknate an thlirho. Scrub typhus vangin Mizoramah mi 42 an thi tawh tih tarlan a ni.

IDSP state nodal officer Dr Pachuau Lalmalsawma'n scrub typhus natna chung­changa Health department hmalak tawhnate leh Mizoram hmun hrang hranga natna thlen dan te, invenna leh enkawlna tem hmachhawp kal mek atana rawtnate a sawifiah.

Health Services director Dr H Lalchungnunga chuan, rannung seh natna thehdarhtu tuhrik tihtlemna tur, damdawi hmanga en­chhinna tur department-in an neih thu a sawi a; scrub typhus chungchanga hmalakna tur leh rawtnate sawihona a ni.

IDSP chhinchhiah danin, scrub typhus natna hi Mizoramah kum 2012-ah hriat ṭan a ni a, hriat ṭan a nih aṭanga nimin thleng khan mi 3,217-in an vei tawh a, mi 42-in an thih phah tawh. He natna hian hrileng (outbreak) angin Mizoramah khaw pakua a tuam tawh a, Thenzawlah chuan ṭum hnih a léng tawh a ni.

Health department chuan rannung seh natna vanga chîâi lo tur leh a vei nia inringhlelte chu a rang thei ang bera damdawi lam thiamte ráwn vat turin  mipui an chah a, "He natna kawltu hi sazute an ni a, a thehdarhtu chu tuhrik an ni," an ti.

Health department chuan, scrub typhus laka inveng turin ramhnuai kal dawnah thawmhnaw phui, taksa khuh kim thei ang ber hâk te, Odomos ointment leh rannung duh loh thil taksaa inchulh te, hna thawh zawha inbual faia thawmhnaw sûk fai te, phûl hmunah leh leiah thil phah loa ṭhut mai mai loh te, chenna in leh a vel sazu leh tuhrik awm theih loh nana tihfai a pawimawh tih an tarlang bawk.