Vanglaini logo

KHAWTHLIR

SEC thar
Mizoram State Election Commissioner (SEC) L Tochhawng chu December 31, 2019 khan a pension-in a chhuak a, Mizoram sorkar chuan SEC hna chelh turin chief secretary Lalnunmawia Chuaungo a ruat. Lalnunmawia hian chief secretary leh SEC hna a kawp dawn a, SEC a nih avangin hamṭhatna dang a dawn belh dawn lo thung.


MJA-in hlân
MJA General Headquarters chuan an member kum 80 tling tawh mi panga hnenah December 29, 2019 khan Krismas leh kum thar thilpek an hlan. MJA-in thilpek a hlante chu Zoram Tlang­au editor Lalbiakthanga Pachuau, Highlander editor Lalkhawliana, Hriatna editor Sang­ṭhuama, Harhna editor C Vulluaia leh Aizawl Observer editor E Lalhleia te an ni.


Heroin man
Champhaia Excise & Narcotics department chuan December 28, 2019 chawhnu dar 2:30 khan Hringlang­tlang péngah heroin gram 382.600 (hawng 27) leh a neitua puh Runhlei­chhuma (29) s/o Hrangvela (L), Myanmar an man. Runhleichhuma hi The Narcotic Drugs & Psychotropic Substances Act, 1985 tlawhchhanin thubuai siamsak a ni.


Mizoram Calender
Information and Public Relations department-in Mizoram Calendar 2020 leh Mizoram Diary 2020 (bu lian leh tê) a siamte chu January 2, Ningani khan Aizawlah phurh thlen a ni. Calendar leh diary-te hi sorkar pisa kai níah chawhma dar 10 aṭanga tlai dar 3 thleng lei theih a ni dawn a; calendar chu pakhat Rs. 50 man niin, diary chu a bu lian Rs. 150, a bu tê Rs. 100 a ni.


Lirthei tlân khap
Aizawl Traffic SP Rodingliana Chawngthu chuan thupek chhuahin, January 7-21, 2020 chhungin Bawngkawn-Tlak lui (Bawngkawn leh Ramhlun North inrina thleng) kawngpui siam a nih dawn avang­in, kawng siam chhungin kawngpuia lirthei tlân phal a nih dawn loh thu a tarlang a; hnathawk tibuai thei turin kawngpui sirah lirthei leh bungrua dah phal a nih loh thu a tarlang bawk.


Minister-in thlirpui
Excise & Narcotics minis­ter Dr K Beichhua 
chuan December 27, 2019 khan Excise & Narcotics department officer-te chu Krismas vuakvêta an department hmalakna hrang hrang a thlirpui. Dr K Bei­chhua chuan, officer-te chu theihtawpa ṭan la zel turin a fuih.