Recognised party nih dilna ZPM-in ECI-ah an thehlut

Zoram Peoples' Movement (ZPM)-in Election Commission of India (ECI)-ah ECI pawmpui political party nih dilna January 21, 2019 khan ECI pisa, New Delhi-ah an thehlut. Hemi chung­changah hian ZPM leader Lalduhoma chuan an la thlen thui loh thu a sawi.

Thu dawn danin, ZPM-in recognised political party nih an dilna hi online hmang pawhin thehluh theih a ni a; mahse, ECI-in a pawmpui hma zawk theihna a nih ringin January 21, Thawhṭanni khan ZPM hruaitute zinga mi Lal­muanpuia Punte leh B Lalchhanzova ten New Delhi-a ECI pisaah kalin an thehlut a ni.

ECI pawmpui an dilna chungchanga zawhna chhangin ZPM leader Lalduhoma chuan, "Kan la thleng thui lo a, kan thehlut tih chin a ni deuh mai. Keini aia hmaa dilna thehlut la pawmpui loh 70 vel an awm a, a kal zel dan tur hriatthiam a har rih," a ti a; chutih rualin, ECI-a hotute nen mimala inhmelhriatna avangin beiseina sang tak an neih thu a sawi.