Cable TV fee chungchang sawiho

Food, Civil Supplies & Consumer Affairs (FCSCA) minister K Lalrinliana hoin nimin khan a pisaah Cable TV Digitalisation fee chungchang a kaihhnawih sorkar department official, Mizoram Consumers’ Union (MCU) leh cable TV operator aiawhte'n an sawiho.

K Lalrinliana chuan, sorkar laipuia Telecom Regulatory Authority of India (TRAI)-in February 1, 2019 aṭanga cable TV leh DTH operator zawng zawngte chu digitalisation ti vek tur leh an consumer-te hnen aṭanga fee an khawn dan tur dan thar an ruahmante hmang vek tura hriattir a nih avangin Mizoramah pawh eng emaw chen nghawng a nei chho zel tih a sawi a, "Mipuite'n an chanvo dik leh ṭha ber an chan theih nan hmalak zel tum a ni," a ti. 

FCSCA Minister chuan, TRAI ruahmanna tharte chu rang leh dik thei ang ber, mipui tana phurrit siam belh chuang loa kalpui a nih theih nan sorkar, MCU leh cable TV/DTH operator-te'n thawhhona ṭha leh lang­tlang an neih a ṭul tih sawiin, mipui tan theih­tawp chhuah turin a chah.

Meeting-ah hian MCU president Chawngsailova chuan TRAI dan thar a sawifiah a, "Mizoramah a dik thei ang bera hman ni se kan duh a ni," a ti.