KHAWTHLIR

Mizoram sorkar chuan thuchhuah siamin, January 26-a Republic Day hmanna pui ber, Lammuala hman turah Mizo mipui tel vek turin an sáwm. Republic Day hi zing dar 8-ah ṭan tur a ni a, zing ni chhuah rualin sorkar building leh mimal inahte hnam puanzar zar a ni ang. 

Inhriattir tur

Aizawl DC chuan thupek chhuahin, Aizawl district chhunga airgun nei zawng zawngte chu Aizawl DC pisaa Arms Branch-ah emaw, mahni awmna hnaih ber SDO(C)/BDO emaw, village council hnena inhriattir vek turin a hriattir a, "Airgun nei zawng zawngte hnenah licence pek tur a ni a, inhriattir lote chu dan anga man leh hrem theih an ni ang," a ti.

District Level  Border Area Development  Programme (BADP) Screening Committee chu nimin khan Champhai DC Dr Naveen Aggarwal hoin DC conference hall-ah an ṭhukhawm a; RD Block pali zinga BADP hmang thei tur pathum - Khawbung, Champhai leh Ngopa BDO-te'n sorkar kum kal taa BADP sum an dawn zûlzuia ruahmanna an duan lâwk cheng nuai 1,221 hman dan tur an sawiho.

BADP sum hmanga sak Sub-Hqtrs YMA, Champhai Office cum Library Building chu nimin khan Champhai North bialtu MLA Dr. ZR Thiamsanga'n a hawng a, lehkhabu leina tur Rs. 10,000 leh lehkhabu thar a hlan nghal.

AH&Vety pisa aṭangin vawk natna, classical swine fever hri hi kum tin February aṭanga July-ah a lên ṭhin thu tarlan a nih avangin Aizawl DC chuan thupek chhuahin, Aizawl district chhunga hmun dang aṭanga vawk lak luh te, hmun danga vawk thawn chhuah te, vawk damlo hralhte leh vawk hrisel lo talhte a khap.

YMA Sub-Headquarters, Champhai chuan nimin khan an pisaah an hnuaia branch hruaitu thlan tharte pualin inhlan tharna hun an hmang. An hun hmanpuitu minister Lalruatkima chuan, chhiatni ṭhatniah YMA-in hma a hruai tih sawiin, "YMA chu hmeithai leh chhumchhiate thlenga tuamhlâwmtu a ni ṭhin. YMA-in hotu a nei lo a, hruaitu erawh a nei a, kawng engkimah hma an hruai ṭhin a ni," a ti a, YMA hi hnam darthlalang, hnam nun kengtu leh tualzal nun tarlangtu anih thu a sawi.