A ṭul chuan NDA aṭanga inhnuhdawh Kan hreh hauh lo - Zoramthanga
MNF president leh chief minister Zoramthanga chuan, Rajya Sabha-a The Citizenship (Amendment) Bill, 2016 (CAB) pass a nih lohna turin theihtawp an chhuah niin a sawi a, "A ṭul a nih chuan MNF hi NDA aṭanga inhnuhdawh kan hreh hauh lo," a ti.
MNF Aizawl South-III North & South Block-in nimina Aibawk khelmuala sorkar thar lawmna an buatsaih a hmanpuinaah thu sawiin Zoramthanga chuan, "Tunlaia kan issue lian tak mai CAB chungchangah kei pawhin theihtawp ka chhuah a, central sorkara hotute ka hmuhnaah pawh sawi berah ka nei. Prime Minister ka hmuhnaah pawh nasa takin ka sawi a ni," a ti a, PM pawhin sawi tur vak a hre lo niin a sawi.
Chief Minister chuan, Home minister Rajnath Singh-a bulah pawh CAB a duh loh thu uar takin a sawi nia sawiin, "'Inremna kan siam hnuah hetianga in tih chuan, tun hma daih tawh khan Burma-ah nge, India-ah nge, crown colony nge tih lo ngaihtuah daih tawh kan ni. Hetiang duh loa fa lu hloha kum 20 rammu tawh kan ni. Nangni pawhin vote zawn nan in ti a nih pawhin, engmah in nih phah lo ang,' ti khawpin ka sawipui. Home Minister phei chuan min ko nawn hial a, official-te nen lo inchhawpin nasa takin kan sawi zui leh a ni," a ti.
CAB dodal turin a rahbi tê tê a awm tih sawiin Zoramthanga chuan, "Kan bei zel dawn a, theihtawp kan chhuah zel dawn. He thil nawr tur hian hma hruaitu nih zel pawh kan duh," a ti a; a ṭul chuan MNF chu NDA aṭanga inhnuhdawh an hreh loh thu a sawi.
CM Zoramthanga chuan, economic development chuangchangah 'Engtin nge in tih dawn?' tih chhanna chu 'Neitu thinlung pûin bul kan ṭan dawn a, a neitu angin ka kalpui dawn' tih a nih thu a sawi a; "Kan vaia daihin kan SEDP hi a kal dawn. A fatu chan, a kawchhung leh a pumpui tlang chhahte chu awm tur a nih rualin mi zawng zawng min daih vek dawn a ni," a ti.
Aizawl South-III bialtu MLA Prof. F Lalnunmawia chuan, sorkar thar a pian avangin mipui an lawma a hriat thu sawiin, "CM ṭha tak leh chak tak Pu Zoramthanga kan nei hi a thlamuanthlak a, Pathian hnenah lawmthu kan sawi a ni. He sorkar hi Pathian ring chunga a kal chuan a ding reng dawn a ni," a ti a; Assembly session ni thum awh neih ṭumah House Leader rawtna angin ṭan hma darkar chanve la awmah ṭawngṭai rualna hun an hman ziah thu a sawi.