Bru camp-ah E.Roll form thawn lo

Chief electoral officer (CEO) Ashish Kundra chuan, electoral roll ennawnna kalpui mekah Tripura relief camp-a awm Bru-te thunna turin form an thawn loh thu a sawi a; electoral roll ennawn mekah dilna 6,000 chuang a luh tawh thu a sawi bawk.

CEO Ashish Kundra hian nimin khan State Media Centre-ah thuthar thehdarhtute a kâwm a; Bru camp-ah electoral roll-a inthun luh dilna form thawn a nih leh nih loh zawhna chhangin, "A hranpain kan thawn lo. Mahse, online hmangin form download theih a ni a, an duh chuan online hmangin an ti thei," a ti.

Ashish Kundra chuan, Mizoram electoral roll ennawnna kalpui mekah vawiin January 25 hi inthun luh, paih leh thil dangte dilna thehluh hun hnuhung a nih thu a sawiin, "Tun thlengin claim 6,000 chuang dawn a ni tawh," a ti a; electoral roll ennawn mek chu Lok Sabha inthlana hman tur a nih thu a sawi.

Zawhna dang chhangin CEO chuan, Lok Sabha inthlan lo awm turah electronic voting machine hman tum a nih thu a sawi a, "EVM hman a nih tur thu hi tun hnai khan Chief Election Commissioner-in a sawi chiang tawh a ni," a ti.

Ashish Kundra chuan, vawiin January 25 hi National Voters Day a nih thu sawiin, "Mizoramah pawh hman a ni dawn a, Aizawlah chuan Governor khuallian a ni ang," a ti a; Voters Day hmannaah hian voter helpline application leh pianphunga rualbanlote (persons with disabilities) tan bika siam application tlangzarh a nih dawn thu a sawi.

CEO Ashish Kundra chuan, Election Commission of India-in helpline (toll free) no. 1950 a neih thu leh, helpline-ah hian election kaihhnawih thil chi hrang hrang zawhfiah theih a nih thu a sawi bawk.