Lei tlahniam enfiahna report Vawiinah thehluh a ni dawn

25th January, 2019

National Disaster Management Authority (NDMA) Expert team chuan nimin khan Armed Veng lei tlahniam an enfiah a, January 23, Nilainia Hunthar Venga lei tlahniam an enfiaha an thil hmuh chhuah report nen vawiinah New Delhi-a NDMA pisaah an thehlut ang.

NDMA mithiamte hian bialtu MLA Robert Romawia Royte leh bialtu councillor PC Lalhmingthanga hoin khawtlang hruaitute'n an lo dawngsawng a; lei tlakhniamna hmun hrang hrang leh lei tlakhniam vanga harsatna thlenna hmunah an hruai a ni.

NDMA mithiamte chuan, tui luankawr ṭhat tawk loh vang leh tui luankawra bawlhhlawh paih a tam lutuk avangin tui luankawr aṭanga tui luang chhuak a tam a, chu vang chuan lei chu a tlahniam thei nia an hriat thu an sawi.

Vanglaini palai zawhna chhangin NDMA-a mithiamte chuan, Hunthar Veng leh Armed Veng an zir chiannaa an thil hmuh chhuahte chu vawiin hian NDMA pisaah an thehlut dawn tih an sawi a ni.

Robert Romawia Royte chuan, NDMA mithiamte chu Chief Minister hmalaknaa lo kal an nih thu sawiin, "Armed Veng lei tlahniam hian in 250 vel a khawih a, a tuar nasa zual bik chhungkaw 96 an awm. Kawng awm zui ta lote pawh a awm nual a ni. He lai hmun hi a tlakhniam zel lohna atan sorkarin theihtawp chhuah a tum a ni," a ti.

NDMA-te rawt angin, veng pahniha lei tlahniam ṭhin vên a nih theih nan Disaster Management & Rehabilitation (DMR) department chuan detailed project report (DPR) an siam dawn. DPR siam chu NDMA-ah thawn a ni ang a, NDMA-in an zir chian hnuah Ministry lamah an thawn ang a, chumi hnuah Mizoram sorkarin an bawhzui a ṭul dawn a ni.

Hunthar Veng lei tlahniam bik atana DPR lo siam tawhah tih ṭhat ngai leh tih belh ngai a awm thu sawiin NDMA mithiamte chuan, "Thil ṭul lem lo telh leh thil ṭul tak telh lohte a awm a. DPR siamṭhat a ni ang a, a hmaa sum mamawh ngai zat tur ang vel thoin DPR siam theih a ni ang," an ti.

NDMA aṭanga mithiam lo kalte hi principal scientist Dr DP Kanungo, consultant Dr Ravinder Singh leh chief geologist Dr BD Patmi te an ni a; DMR department hotute'n an ṭawiawm a ni.