District 3 kan tipuitling ngei dawn - Lalruatkima

Rural Development minister Lalruatkima chuan, inthlan dawna MNF party auhla pakhat - district headquarters puan tawh pathumte chu MNF sorkarin an tihlawhtling ngei dawn niin a sawi.

Lalruatkima hi January 23, Nilaini zan khan Khawzawlah a riak a, a thlenna DC Rest House-a Khawzawl District Implementation Demand Committee (KDIDC) hruaitute nen inkâwmin, KDIDC chuan memorandum an hlan. MNF sorkar chu Khawzawl district petu an nih angin, a rang thei ang bera district tihpuitlintir turin an ngen a ni.

RD Minister chuan, MNF sorkar hmasain district headquarters pathum an lo puan tawh - Khawzawl, Saitual leh Hnahthial-te chu tihpui­tlin ngei an tum thu a sawi a, "Tunah hi chuan bul inṭan thar chauh kan nih avang leh hma la turin hun pawh a la awm lo a, sorkar tan hmalak theih a la ni rih lo a ni," tiin, KDIDC hotute chu dawhthei tak leh ngaihṭha taka lo awm turin a chah.