Governor-in Lawngtlai a tlawh

Governor Kummanam Rajasekharan chuan nimin khan Lawngtlai a tlawh a, helipad-ah Lai Autonomous District Council (LADC) chief executive member (CEM) T Zakunga, LADC chairman V Zirsanga leh Lawngtlai SP Amit Goel ten an lo dawngsawng.

Larsap chuan, Governor a nih tirh aṭangin autonomous district council-te tlawh vek a duh thu a sawi ṭhin tih sawiin, "A hmasa ber atan Lawngtlai ka tlawh thei hi ka lawm hle. Lawngtlai district hi Mizoram mai ni lo, India ram pumpui tan pawh district pawimawh tak a ni a, India hmarchhaka sumdawnna hmél thlak danglam dâwrh tur Kaladan Multi Modal Transit Transport Project kawngpui sial mekin a paltlang district a nih bakah, India, Myanmar leh Bangladesh-te ramri intawh khawmna hmun a nih avangin district chhunga chengte'n mawhphurhna pawimawh tak an nei a ni," a ti.

India ram danpuia Sixth Schedule hnuaia Governor mawhphurhna a pek angin, Lawngtlai a tlawh hmasak berah LADC hnathawh lama a insâwr bing deuh thu sawiin Governor chuan, "Lawng­tlai ka tlawh hian an huam chhung tihhmasawnna atana LADC-in mawhphurhna a neihte min hriat thartir a ni. Hnam ziarâng leh thil hlu vawn ṭhat kawngah Lai hnam hi an harh ṭha hle," a ti a; Mizoram leh India ram tana a ṭha thei ang bera hna thawk turin district mipuite a sáwm.