National Girl Child Day hmang

India ram hmun dang rualin nimin khan Mizoramah ‘National Girl Child Day’ hman a ni a, Aizawlah state level rally buatsaih a ni. Hmeichhia fa dinhmun chawi kânna tura ruahmanna, Beti Bachao Beti Padhao (BBBP) scheme kalpuina district pa­hnih - Siaha leh Ser­chhip district-ahte chuan he ni pual hian BBBP Week hman a ni.

National Girl Child Day 2019 thupui, 'Empowering girls for a better tomorrow' tih hmangin nimin khan khan Vanapa Hall kawtah Social Welfare department huaihawtin hun hman a ni a; Social Welfare director Laldikkimi'n Day hman dan sawiin, "India rama hmeichhe naupangte khaw­tlangah te, zirna lamah te, faina leh hriselna lamah te, dikna chanvo leh a dangahte harsatna an tawh ṭhin laka chhan chhuah leh mipuiin an bengkhawn zawkna atana tlangzarh a ni,"a ti.

Social Welfare Director hian hmei­chhia leh hmeichhia naupangte dan hnuai­a hum an nih dan sawiin, "Domestic violence vangin naupangin an tuar nasa a, chumi laka venna atan sorkar chuan dan ṭha tak an nei," a ti.

Vanapa Hall kawta hun hman hnuah Millennium Centre thleng ke-a kalin kawng an zawh a, Millennium Centre kawtah inkhawm an nei leh a ni a; Lalnghinglova Hmar, joint editor  Vanglaini in thu a sawi a, zaithiamte zaiin hun an hmang.