Khelo India medal late lawmpui

2nd. Khelo India Youth Games, 2019-a Mizoram tana medal latu mi 47-te lawmpuina hun nimin khan Assembly Annexe conference hall-ah buatsaih a ni a, 

Sports & Youth Services minister Robert Romawia Royte-in a hmanpui.

Sports Minister chuan kum khat chhunga sports policy an siam tur thu a sawi a, "Kan sorkar aṭanga ni 365 ral hma ngeiin Mizoramin sports policy a nei ang," a ti a, policy mumal tak hnuaiah awmze neia kal a nih tur thu a sawi.

Robert Romawia chuan Sports association hrang hrangte chu an telna competition hre chiang tur leh, India ram inelna lian thama lan tuma bei turin a chah a, "Khawi khawiah emaw international competition-ahte medal 20-30 te an rawn hawn a, National Games-ahte tel phak an tlem leh si," tiin kalphung ṭhenkhat chu ennawn ṭul a tih thu a sawi a; sorkar laipui pawmpui leh a ngaih pawimawh intihsiaknaa lawmman lak tum turin infiammite a chah.

2nd. Khelo India Youth Games hi Pune, Maharashtra-ah kumin January 9-20 chhung khan neih a ni a, Mizoram aṭangin infiammi 114 leh team official 24 an kal a, medal 13 - gold pali, silver pali leh bronze panga lain a pumpuiah 16-na an ni. 

Games-ah hian state leh union territory 36 aṭangin infiammi 7,000 chuang an tel.