KHAWTHLIR
Thisen pe
Zirtiri Residential Science College NSS unit chuan nimin khan an college-ah blood donation camp an huaihawt a, mipa 86 leh hmeichhia 30-te'n Aizawl Civil Hospital tan thisen unit 116 an pe. Khawzawl College NSS unit pawhin nimin khan Champhai District Hospital tan thisen unit 28 an pe a, a petute mipa 20 leh hmeichhia pariat an ni.
MISA khawmpui
Mizoram Industries Service Association chuan nimin khan Aijal Club-ah inkhawmpui an hmang a, Industries minister Dr R Lalthangliana'n a hmanpuiin, miin inpekna thûk zawk nena hna a thawh chuan eng hna pawh ni se, mi dang tan malsawmna a nih ṭhin thu a sawi.
Lehkhabu tlangzarh
Aizawl Theological College-a SCMI unit buatsaih, 'Mizo Identity Bihchianna' tih lehkhabu chu nimin khan ATC principal Rev.Prof. Vanlalnghaka Ralte-in a tlangzarh. Lehkhabuah hian mi 17 thuziak a chuang a, Synod Bookroom-ahte lei theih a ni.