KHAWTHLIR

State Election Commission chuan, February 16, 2021-a Aizawl Municipal Corporation (AMC) inthlana vote tlate chu Pachhunga University College (PUC)-ah chhiar tur a nih thu a tarlang. February 18, 2021 chawhma dar 10 aṭangin vote chhiar ṭan tura ruahman a ni.

Mizoram Pollution Control Board (MPCB) chuan sorkar laipui project  Swachhta Action Plan (SAP) hnuaiah February 9-10 khan Aizawla home hrang hrangah hmai tuamna, hand sanitiser leh a nghahchhan (stand) an sem. An thil sem hi Covid-19 laka mipui an him theih nan leh an fimkhurna atana tih a ni.

Nimin tlai dar 5 dinhmun angin, State Referral Hospital-ah Covid-19 vei mi pathum enkawl mek an ni a, pahnih chu ICU-ah awmin, Isolation ward-ah pakhat a awm. SRH-ZMC Bulletin tarlan danin, ICU-a awmte chu ventilator hmanga enkawl ve ve an ni a, ward-a awmin harsatna lian tham a nei lo.

ZPM Legislature Party member pahnih - C Lalsawivunga leh Dr Vanlalthlana te chuan Thawhlehnia Bairabi-a Mizo leh hnam dang inkara buaina chhuak ngaihvenin nimin khan Bairabi an tlawh a; buaina avanga hliam Bairabi VC Vice President damdawi-inah an kan bawk.

Traffic SP Rodingliana Chawngthu chuan, Chanmari-Chaltlang kawngpuiah tui pipe phûm mek a nih avangin he kawnga two wheeler tlân dan ruahmanna a tichhuak. Two wheeler tan zing dar 8:30 aṭanga chawhma dar 11 leh tlai dar 3:30 - 5:30 inkarah tlân phal a ni lo a, Chaltlang aṭanga Chanmari pan tur two wheeler-te chu Laipuitlang kawngah tlân tur niin, Chanmari aṭanga Chaltlang pan turte chu Ramhlun/Edenthar Veng lamah tlân tur a ni. 

Champhai South bialtu MLA TJ Lalnuntluanga, minister of state chuan nimin khan Champhaia GM Higher Secondary School leh Kanan Veng Primary School-IV te a tlawh a, an mamawh leh harsatnate a en. Nimin vek khan Ruantlang Lersia Field chhaka lei tlahniam leh Champhai Kanan Venga lei tlahniamte a enfiah bawk.

Mizoram University leh Universiti Malaysia Terengganu (UMT), Malaysia chuan nimin khan thawh dunna thuthlung, Memorandum of Understanding an ziak. MoU hi online kaltlanga ziah a ni a; MZU aiawhin vice chancellor Prof. KRS Sambasiva Rao leh MZU International director Prof. HK Laldinpuii Fente ten hming an ziak a; UMT aiawhin vice chancellor Prof. Dato, Dr NA Haji Mokhtar leh Prof. M Effendy ten hming an ziak a ni.