Parliament-ah Zokhawthar Border Trade sawi chhuak

Parliament session neih mekah Mizoram Rajya Sabha MP K Vanlalvena chuan nimin khan Zero Hour-ah thu a sawi a; Zokhawthara Indo-Myanmar Border Trade Centre khâr chungchang leh a kaihhnawih thilte a tarlang.

Sorkar thuchhuah tarlan danin, K Vanlalvena chuan, Covid-19 hripui léng vangin Zokhawthara Indo-Myanmar Border Trade Centre chu April 2020-ah khàr ṭan a nih thu a sawi a, "Sumdawng mi ṭhenkhatte'n sorkar hriatpui lohin hmun pasarih velah ramri kaltlangin motor kawng an siam a, hengah hian ram dang bungrua tam tak dan loin Mizoramah a lut reng a ni," a ti a; dan loa bungraw lutte aṭangin sorkarah chhiah a luh loh thu a sawi.

Sorkar hriatpui loha kawng laih chawpte chu dan loa sumdawnna kawngpui hlunah a chan mai a hlauhthawn thu sawiin MP chuan, "Hun lo kal zel turah harsatna lian zawk thleng thei pumpelh nan a rang thei ang berin Zokhawthar Border Trade hi hawn chhunzawm a ngai a, sorkar laipui hian a ṭul angin hma la thuai se," a ti.