Dik taka Aizawl rorelsak duhtu leh duh lotu mipui hmaah kan ding - Duhoma

ZPM leader Lalduhoma chu February 9, Thawhlehni khan Aizawla hmun hrang hrangah AMC inthlan atan a campaign a; dik leh langtlang taka Aizawl khawpui rorelsak duhtu leh duh lotute mipui hmaah an ding tih sawiin, uluk taka ngaihtuaha duh thlang turin mipui a ngen. 

Hunthar Venga AMC Ward VI campaign office a hawnnaah Lalduh­oma chuan, "Dik tak leh langtlang taka Aizawl khawpui rorelsak duhtu leh duh lotu in hmaah kan ding a, mipuite'n eng zawk nge kan thlan dawn tih uluk taka lo ngaihtuah turin ka ngen che u a ni," a ti.

Lalduhoma chuan, ZPM-in AMC hnuaiah ward committee din an tum thu sawiin, "Dik tak leh langtlang takin ro kan rél ang a, AMC sum hman dan langtlang takin kalpui a ni ang kan tih laiin, ward committee din kan sawi ringawt helh tâwk party-te an awm a ni," a ti a; ward committee din an tum helhtu party-te'n langtlang taka rorel an tum lo tih a lan chian nghal thu a sawi.

Inkhawmah hian ward VI-a ZPM candidate Zohmingthanga Zote pawhin thu a sawi a ni.