Municipal-ah state sorkar a inrawlh chuan Danpui an zah lo tihna a ni - Congress party

MPCC secretary pahnih, AMC inthlana candidate Rosiamngheta leh H Vanlalruata te chuan nimin khan Aizawl Press Club-ah thuthar thehdarhtute an kâwm a; municipal sorkarah state sorkar a inrawlh chuan India danpui zah lohna a nih thu an sawi.

Rosiamngheta chuan, muni­cipal chu thawh tur bik (subject) neia khawpui inrêlbàwlna a nih thu sawiin, "State sorkar inrawlh a thiang lo. Municipal sorkara inrawlh duh state sorkar chuan Indian Constitution-a ziah luh khawpui mite dikna leh chanvo an rapbet a, khawpui mite inrêlbàwlna leh tihhmasawnna tur danpuia inziak an zah lo a ni," a ti.

AMC hna leh thuneihnaah state sorkar a inrawlh thiang lo tih sawiin Rosiamngheta chuan, "Mahni thuneihna hria, sorkar rin chhan tum ve lo, khalh kual mai mai theih loh tur hma la ngam mayor Aizawlin a mamawh. Dap chawp leh inzir chawp turin Aizawl hi kalpui chi a ni tawh lo," a ti a, khawtlang leh ram hruai tur leh hmasawnna hna thawk tak tak turin tawnhriat nei ṭha an pawimawh niin a sawi. 

Rosiamngheta chuan, municipal sum chu state ruling nih vanga dawn tur angin zirtirna a kal leh mek tih sawiin, "Central aṭanga sum lo kal AMC-a a pek tlai avanga a leichàwi en hian, municipal-ah state sorkarin thu a nei lo tih a chiang. State sorkarin AMC sum a pawt péng thei lo mai ni loin, a huna a pek loh chuan lei a cháwi zawk ṭhin," a ti.

Municipal-ah state sorkarin a thunun loh, mahnia rorel ngam, ruling party office bearer-te'n an thunun theih loh tur thlan an ngaih thu sawiin Rosiamngheta chuan, "State-a sorkar lai kher thlan hi hmasawnna a ni lo. AMC-in subject a enkawl ngeite hmanga mipui tana hna thawk ngam leh thiam tur thlan hi hmasawnna a ni," a ti a; rahbeh municipal a pian loh nan ngaihtuahna séng turin mipui a sáwm.

Rosiamngheta chuan, party pakhatin kalphung thar an tih chu inbual fai loa kawr fai hâk ang chauh a nia sawiin, "Ṭawngkam thar mai a ni. MPCC chuan ward tinah Congress candidate-te vote tling ṭheuh turin Aizawl mipui kan sáwm tak meuh a che u," a ti.

Zawhna chhángin MPCC secretary-te chuan, AMC term liam tain state-ah Congress sorkar leh MNF sorkar an hrawn ve ve a, danglamna a awm loh thu an sawi a, "Pawisa an ngah sawt emaw, hna an thawh ṭhat sawt kan hre lo," an ti. State-a an sorkar hnuah MNF councillor-te'n an dinhmun a têt sawt thu an sawi zawk niin an sawi bawk.