Kalphung thara kal intite'n kalphung an thlâk zing - Zorama

MNF president Zoramthanga chuan, AMC inthlanah MNF-in sorkar ngei an tum thu a sawi a; kalphung thara kal nia insawi ZPM-te'n kalphung thar an thlak zing lutuk niin a sawi bawk.

Zoramthanga hian February 9, Thawhlehni zan khan Berawlui venga an party zawm tharte a lawm luhnaah thu sawiin, ZPM leader Lalduhoma chu party hrang hranga awm kual tawh a nih thu a sawi a, "ZPM hi an hotute'n 'Kalphung thara kal party kan ni’ an inti a, kalphung thar an tih hi a tharin an thlak zing lutuk a, mipuiin zui tlâkah an ngai tawh lo," a ti.

Congress party chu India ramah an tluchhe mek zel nia sawiin Zoramthanga chuan, "Pathian pawi an sawi vang a ni. Delhi-a an party president nihna chelh rei ber chu Kristian, Catholic ṭha tak a ni ṭhin a, a fapa Rahul-a tan Hindu puithiam hnenah malsawmna dil a duh tlat a, Pathian pawi a sawi avangin zuih lam an pan ta a ni," a ti a; Mizorama Congress party pawh beih em em ngai tawh loin an chuai mek niin a sawi.

MNF President chuan, AMC inthlanah Pathian ṭanpuinain sorkarna lâk ngei an tum tih sawiin, "Pathianin MNF thlipui a tlehtir hun lai a ni a, a thli beng lo záwnga lehkhachaih lo chaih ve chu a thlâwk tha duh lo, a thli beng thiam zawng hi en a ngai ṭhin," a ti.

Mi ṭhenkhatin, 'MNF sorkarah hna in la thawk tam lo em mai’ tia an sawi chu a dik tih sawiin Zoramthanga chuan, "Kum 2019 tìr velah hma kan la ṭan thei a, MP inthlan avangin Model Code of Conduct-in min phuar zui a, fûr chhe chinah hna kan thawk ṭan. Kum 2020 kan kái a, March aṭangin hripui léngin min tibuai leh a, vawiin thleng hian kan hnathawh theih tak tak hun chhung hi thla 8 emaw vel lek a ni," a ti a; hna thawk tak tak turin Pathianin a malsawmna hun a pe dawn tih a sawi bawk.