COVID-19: Mizoram dinhmun Chhuahtir tawh zat 99.34%

February 9, Thawh­lehni khan Mizoramah Covid-19 vei mi pahnih hmuh chhuah a ni a, tun hnaia state páwn aṭanga rawn lut hnam dang ve ve an ni. Nimin khan hripui laka fihlîm tawh mi pakhat chhuahtir a ni a; Covid-19 positive hmuh tawh mi 4,388 zinga mi 4,359 (99.34%) an chhuak tawh.

Covid-19 vei Thawh­lehnia hmuh tharte chu ZMC laboratory-a hmuh chhuah an ni a; BSF sipai kum 48 leh 51 mi, quarantine facility-a khung hran mek, Covid-19 symptom nei lo ve ve an ni. TrueNAT-PCR leh Rapid Antigen Test (RAT) hmanga swab sample endikte chu a negative vek thung.

Hripui laka fihlîm tawh nimina chhuahtir awmchhun chu Lunglei Sazaikawn CCC aṭanga chhuahtir a ni.

Mizoramah Covid-19 vei mi 4,388 hmuh chhuah a ni tawh a, mipa 3,211 leh hmeichhia 1,177 an ni. Nimin tlai dar 5 thleng khan mi 4,359 (99.34%) chhuahtir an ni tawh a, mi pakua (0.20%) thi tawhin, enkawl mek mi 20 (0.46%) an awm. 

Thawhlehni khan ZMC laboratory-ah swab sample 81, TrueNAT-PCR hmangin district pathumah sample 10 leh RAT hmangin district 11-ah sample 841 endik a ni a; sample endik zawng zawng chu 932 niin, chu'ng aṭanga Covid-19 positive hmuh chhuah pahnih chu 0.21% a ni.

February 9, 2021 thlenga Mizorama swab sample endik tawh zat chu 2,17,442 a ni a, chu'ng aṭanga Covid-19 positive mi 4,388 chu 2.02% a ni. Hripui vei hmuh tawh zinga mi 2,078 chu Mizoram chhunga kái an ni a, mi 2,310 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district pariat - Siaha, Champhai, Kolasib, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. District pathum - Aizawl (15), Lunglei (3) leh Lawngtlai (3) district-ahte chiah hripui vei an awm rih a ni.