Bairabi leh Gharmura-a thil thleng an dem

February 9, Thawhlehni zanah hnam dang mi ṭhenkhatin Gharmura Mission Compound an suasam leh a chhunga chêng missionary-te chhungkua kut an thlak chu Mizorama political party leh páwl hrang hrangin an dem thu an tarlang.

MNF Legislature Party member-te nimina ṭhukhawm chuan, Assam mi ṭhenkhatte'n Thawhlehni tlaiah Zophaia harsatna an rawn siam chu pawi an tih thu tarlangin, "Gharmura Mission Compound-a nu nau pawi sawi lote kut thlaka thisen an chhuah bakah, in leh lo indiriam sak leh inhâlsakna a thleng hi pawi kan tiin kan dem tak zet. Hliamte kan tawrhpui a, an ṭhat leh thuai theihna turin kan duhsak a ni," an ti.

Mizo mipui thlavâng hauh tura Kolasib bialtu MLA K Lalrinliana, minister a hmunah a kal nghal leh DC leh police-te a ṭul anga che mai thei tura sorkarin a tír nghal tih tarlangin MNF MLA-te chuan, "Tunah hian Bairabi an ṭhutchilh mek a ni," an ti a; mipui thlamuana thlavâng hauh turin MLP member R Lalzirliana, Lalrinawma, Lawmawma Tochhong, Ramthanmawia, Dr Pachhunga leh H Lalzirliana te a hmuna kal nghal turin an ruat tih an tarlang bawk.

ZPM party chuan, Thawhlehni zana Gharmura-a thil thleng vanga Gharmura Mission Field-a missionary-te leh an chhungte an sahimna tura Mizoram lama rawn lutte chu nimin zing dar 9:30 vel khan ZPM general secretary PC Vanlalruata leh Bairabi-a ZPM hruaitu ṭhenkhatte'n Bairabi checkgate-ah an lo hmuak tih an tarlang.

ZPM chuan, missionary rawn hawte chu an thla hual nan PC Vanlalruata'n ZPM hmingin pawisa a hlan bakah, Thawhlehni tlaia Zophaia buainaa hliam H Vanlalrova (55) leh PC Lalhmunsiama (25), Bairabi ve ve, Bairabi damdawi-ina enkawl mekte an tlawh a, kanna sum an pe tih an tarlang a ni.

Zophai leh Gharmura-a thil thleng avangin BJP, Mizoram Pradesh chuan nimin khan an pisaah emergency meeting an nei a; thil thlengte leh Mizo ṭhenkhatin hliam an tuar chu pawi an tih thu an tarlang.

Mizoram BJP chuan, Gharmura Mission Compound beih chungchangah, a mawhphurtute man an nih theih ngeina turin Assam Chief Minister, Assam BJP President leh NEDA Convener-te an hriattir tih an sawi a, "Assam sorkar hnenah misualte man chhuak ngei tur leh na taka hremna pe turin kan hriattir a ni," an ti. Gharmura-a buaina chhuaka hliamte chu Synod Hospital-ah nimin khan an tlawh tih an sawi bawk.

PC party chuan, Bairabi Zophaiah hnam dang kut tuartu Bairabi VC member-te chu an lainat thu sawiin, kut thlaktute chu a rang thei ang bera man a, hrem an nih ngei theih nan chak taka hma la turin Mizoram sorkar an phût tih an tarlang. Gharmura-a missionary-te kut thlaktute pawh hrem ngei turin Assam sorkar an phût bawk.

Central YMA hruaitute chu nimin zing khan Bairabi South Branch YMA Committee Room-ah YMA sub-headquarters Kolasib, Zampuimanga Group, Bairabi Joint YMA leh Bairabi North leh South branch hruaitute nen an ṭhukhawm a; Zophaia buaina chungchang an sawiho.

CYMA chuan, buaina chhuak avanga ram leh hnam tana ke pên inpeih Mizoram hmun hrang hrangah an awm tih an hriatin, lawmawm an tih thu an tarlang a, "Tun dinhmunah boruak a muanawm zel avangin boruak ṭha lo zawk a thlen tawh loh nan Bairabi Zophai lam pan khawm lo turin kan inngen e," an ti.

CYMA hruaitute hian Thawhlehni tlaia Zophaia buaina chhuaka hliam Mizo pathumte chu Bairabi damdawi-inah an kan a ni.

MSU chuan, Assam lamin Mizoram chhunga kawng an laih an endik tih sawiin, "Assam hian ramri lui (Golachhera) rawn pêlin Pu Nghaka Hnamte leilet thleng kawng an rawn lài tawh. He hmuna hnathawh mek titawp tura January 29, 2021-a Kolasib-a Hailakandi DC leh Kolasib DC thu dah bawhchhiaa Assam sorkarin hma an la chhunzawm hi hriatthiam harsa kan ti a, Mizoram sorkarin a hre lo pawh hi kan dem," an ti.

MSU hian Mizoram chhunga Assam sorkarin kawng an laih mek chu a rang lama titawp tur leh chumi vanga buaina chu chingfel thuai turin Mizoram sorkar an phut a; buaina thleng vanga hnam dang kut tuar Mizote chu zángnadawmna pe turin Mizoram sorkar an ngen bawk.