MNF hi sorkarna siamtir leh tlak an ni lo - ZPM Ṭhalai

ZPM Ṭhalai hruaitute chuan nimin khan ZPM pisaah thuthar thehdarhtute an kâwm a; MNF party chu AMC-ah sorkarna siamtir leh tlak an ni lo tih an sawi.

ZPM Ṭhalai president Malsawmzuala chuan, "MNF hi kum 2015 AMC inthlana an thutiam, an manifesto 19 zingah pathum chiah an tihlawhtling a, kum nga chhunga an tihhlawhtlin tura an tiam 10% chauh tihlawhtlingtute hnena rorelna pek nawn hi mipuite'n kan ba lo a ni," a ti a; AMC-a MNF sorkar sum hman dan felhlel tam lutuk leh mipui sum hmanga an mi leh sate an induhsak ṭhin avangin an kuta Aizawl khawpui dah a him loh thu a sawi a ni.

Malsawmzuala chuan, kum 2015 AMC inthlana an intiamna 10% chauh an tihhlawhtlin avangin tun ṭum AMC inthlan tura an intiamna pawh ‘Mumang bu’ ang chauh a nih thu sawiin, "AMC hi MNF hian Aizawl siamna atan ni loin, anmahni insiamna atan an hmang a, AMC an suasam duh dan aṭang hian an kutah sum leh thuneihna dah ngam chi a ni tawh lo," a ti a; ZPM chuan AMC chu ram hlui zia paih nan leh kalphung thara kal tura bul ṭanna atan hman an tum thu a sawi.

ZPM Ṭhalai President sawi danin, AMC hman tur bawlhhlawh paih motor thar 54 chu October 2, 2017-ah UDPA minister Zodintluanga'n a vailiam a, a vaiin Rs. 10,70,06,290 man niin, chawlhrualin pakhat Rs. 19,81,598 man ang a ni. Motor 54 zinga 45 chu lei a nih aṭanga thla 16-na vel, February 29, 2019-ah tláwm taka tihral a ni a, an tihralna man belhkhawm chu Rs. 2,77,08,300 niin, chawhrualin pakhat Rs. 6,15,740-a hralh ang a ni. Kum khat leh thla li chhungin Rs. 13,65,858 (68.92%) an hloh hman tihna a ni.

Bawlhhlawh paih motor lilàm chhángtute hnenah bawlhhlawh paih hna (contract) pek vek a ni a, a changtute chu MNF party worker deuh vek niin, chhángtu zingah councillor pawh an tel a, mi dang hmingin an chháng niin an sawi.

MNF AMC sorkar liam tain consultancy firm pakhat rawih nan Rs. 3,44,50,169 an séng tih an sawi bawk.