Social Media Warrior Engagement Drive Kalpui ṭan turin MPCC-in an tlangzarh

India National Congress (INC) Social Media department chuan February 9, 2021 aṭang khan Social Media Warrior Engagement Drive a kalpui ṭan. MPCC Communication department pawhin nimin khan an pisaah thuthar thehdarhtute kâwmin, drive chu an kalpui ve nghal thu an sawi.

MPCC Communication chairman Sangzuala Hmar chuan, BJP kaihhruai sorkar laipuiin dâwt tinréngin India mipui an bum mek nia sawiin, "Râwvâ takin ro a rél a, loneitute lungawi lo an nuar mek a, migrant worker-te an lungawi lo a, India ram economy an sawp chhe lailet dêr tawh a, harsatna naménloin min tlâkbuak mek a ni," a ti.

Sangzuala Hmar chuan, Mizoramah pawh BJP thawhpui MNF sorkarin dâwt tinréng mipui an fah mek nia sawiin, "Sum a tam ti chungin Mizoram economy an sawp chhe mek a, an intiam apiang an tihlawhtling thei lo," a ti a; Mizo mipuiin MNF sorkar chu rin dan tur an hrethiam tawh lo niin a sawi.

MNF party-in Mizo mipui, NLUP dawng tawh zawng zawng pawh Rs. 3,00,000 dawng vek turin an tiam tih sawiin Sangzuala chuan, "Hei hi mipuiin an beisei peih tawh lo," a ti.

Sangzuala Hmar chuan, AMC inthlan awm turah MNF-in thil tam tak an tiam tih sawiin, "Sorkar hnathawkte'n an sum khâwl, an pension huna an lâk chhuah ṭhin chu pek tur nei lo chungin ward tinah cheng nuai tam tak pek an tiam a ni," a ti a, sorkar hnathawk hlawh an pek ṭhat theih loh thu a sawi.

Minister pakhatin Mizo mipui duh danin ramri chinfel a nih tawh thu tun hnaiah a sawi nia tarlangin Sangzuala chuan, "Nimin, nizan lawka thil thleng nen chuan a inmil lo hle. Kan ram chhungah Assam sorkarin kawng an lài a, min sawisa a, vai rama Mizo awmte'n kut an tuar mek a ni. Dâwt ringawta inkaihhruai hi Mizo mipuite'n kan ning tawh," a ti.

MPCC Communication tarlan danin, Social Media Warrior Engagement Drive hi ṭhalai lehkhathiam, social media lama inhmangte tana sorkar khalh ngiltu nih theihna hun hawnna, awlsam taka Congress social media pasalṭha nih theihna tura ruahman a ni a; campaign zawm duh tan 1800 1200 00044 ah missed call tur a ni.