NGO-te'n Republic Day an boycott Mi tlem têin R-Day an hmang dawn

NGO Coordination Committee chuan The Citizenship (Amendment) Bill, 2016 (CAB) an duh lohzia lantirna atana Republic Day (R-Day) boycott an tum chu an kaltlangpui dawn. Hetih lai hian, vawiina Republic Day lawm tur chungchangah sorkar lam hotute nen inbiak remna an nei a, chumi ang chuan R-Day hi mi tlem tein an hmang dawn ang. 

Joint NGO hruaitute hi nimin khan chief minister Zoramthanga chuan Secretariat conference hall-ah a kâwm a, R-Day boycott lo turin a ngen. Joint NGO hruaitute erawh chuan, CAB duh loh lantirna atana R-Day boycott an tum chu an ṭhulh theih loh thuin an chhâng a ni.

Chief Minister ngenna avang leh sorkar tirha Mizoram Kohhran Hruaitu Committee (MKHC) ngenna avangin Joint NGO-te chuan R-Day-a kal tur chin bituk neih an remti a; chumi ang chuan R-Day hmanna, Lammualah leh district dangahte pawh mi tlem te an kal thei dawn a ni. MKHC hruaitute leh NGO hruaitute hi January 24, Ningani zan khan CYMA pisa-ah an inkâwm a ni. 

Meeting-ah hian Chief Minister hi speaker Lalrinliana Sailo, Home minister Lalchamliana leh minister dang ṭhenkhatin an ṭawiawm a ni. 

Hetih lai hian, Central YMA General Secretary-in Aizawla YMA branch hrang hrangte hnena January 22, Thawhlehnia lehkha a thawn chhuahah chuan, R-Day boycott a nih dawn avanga YMA member-te duty dan tura ruahmanna an siam chu kaltlangpui a ni dawn.

CYMA lehkhaa a lan danin, Republic Day boycott a nih dawn avangin, Republic Day hmannaa kal turte dang turin zing dar 6-ah YMA member-te thawh chhuah tur a ni a, hmun pathumah duty-na tur ruahman a ni.

Duty-na turte chu - Lammual luhna gate bulahte a ni a; Aizawl chhim lam YMA branch member-te chu Dak-Inpui bulah duty tur a ni a, hmar lam branch member-te chu Ritz Hotel bula Lammual gate-ah duty tur niin, Lammual main gate bulah Aizawl chhuah lam leh tlâk lam bakah, branch hnaivai member-te duty tur a ni thung. 

Nimin vek khan Lawngtlai DC N Chakhai pawhin CAB avanga R-Day boycott tum Central YLA hruaitute a pisaah a kâwm a, R-Day boycott lo turin a ngen. CYLA-te'n boycott an ṭhulh theih loh avangin inremna angin ruahmanna thar siam a ni. A tira Central YLA khelmuala R-Day hman tum chu ṭhulh a ni a, DC pisa tualah hnam puanzar pawh pharh a ni ang. 

-    Aizawl khawpui chhunga sorkar hotu pawimawh zual tlem tête'n programme hmangin, mipui náwlpui, sikul naupang lám turte leh inremnaa tel lo zawng zawngte chu programme-ah hian kal loh ni se.

-    District level-ah chuan DC office tualah DC-te'n flag an pawh pharh remtih a ni a, mipui leh ṭawiawmtu an tel erawh remtih a ni lo.

-    Sub-division/block level-ah pawh function hman remtih a ni lo a, flag erawh pawh pharh theih a ni.

-    Central institution hrang hrang leh Central Govt. office hrang hrangte pawh programme a hranpaa hman remtih a ni lo.