Mizoram GST-ah hnam dang 810 ziak lut tawh

Mizoram Merchants Asso­ciation (MIMA) hruaitute chuan, Mizoramah GST hnuaia hnam dang inziak lut zat chu 810 an tling tawh tih sawiin, "Tunah hian sumdawnna leh ei leh bar zawnnaah Mizote chîmralin kan awm ṭan der tawh a ni," an ti a; sumdawnnaa Mizote chîmrala an awm loh nan sorkarin ILP Cell din se an duh thu an sawi.

MIMA hruaitute hian nimin khan Aizawl Press Club-ah thuthar thehdarhtute an kâwm a; an president PC Laldinthara chuan, RTI Act hmanga an zawhna chhannaa a lan danin, Mizorama hnam dang sumdawn phalna nei zawng zawng chu 810 an tling tawh tih sawiin, "Hei hi GST lak ṭan, July 1, 2017 hnu lama mite chauh an ni," a ti.

MIMA President-in a tarlan danin, GST hman hnua Mizorama hnam dang sumdawng register tawh zat mi 810 zinga 367 chu Mizoram Taxation department hnuaia register an ni a, mi dang 443 chu Central Commissionerate hnuaiah ziah luh niin, chu'ng mite chu online hmanga dilna thehluta pawmte an ni.

PC Laldinthara chuan, hnam dang sumdawng lian tak takte Mizorama luh tumin an inhmûr tuau tuau ni bera a lan thu sawiin, "Kum khat leh a chanve vel chauha hetianga hnam dang register an tam chuan, kum 4/5-ah chuan Mizote hi kan ṭhenawm state ang chiahin, sumdawnna leh ei leh bâr zawnna kawngah chîmral kan ni dawn. ILP nei lo ang maiin kan awm a, Mizote i harh mawlh ang u," a ti. 

MIMA hruaitute sawi danin, hnam dang hnena Mizorama sumdawn phalna pe tur chuan Inner Line Permit (ILP) a inzawm zata kum hnih chhung nei an nih a ngai a; chu chu Guidelines for the Enforcement of the Inner Line Regulations in Mizoram no. 12(1)(2)-ah a chuang.

Chutih laiin, Mizoram sorkarin ILP kenkawhna tur dan a siam, The Inner Line Regulation no. 3(1)-ah chuan, ILP hi chu thla ruk aia rei lo atan pek theih a ni a, a thih hmain thla ruk dang vawi hnih tihnun (renew) theih a ni. A vaiin thla 18 (kum khat leh a chanve) chhung ILP pek theih a ni tihna a ni a, a záwna kum hnih chhung hnam dang hnena ILP pek (two years validity) pek chu mimal ang chuan a theih loh tluk a ni.

Mizo hnam, a bikin sumdawnna lama an himna atan Mizoram sorkarin ILP khauh taka an kenkawh a ṭul thu sawiin PC Laldinthara chuan, "Kan sorkar thar hian Mizo hnam boral mai tur chhan nan ILP hi hmang se, khirh takin kalpui rawh se. A tuartu leh a hre chiangtu sumdawngte ráwn chungin sorkar angin ILP Cell dinin kalpui rawh se tiin kan ngen tak meuh a ni," a ti.

Zawhna chhangin MIMA hruaitute chuan, Central Commissionerate hnuaia GST-a inziak lutte chu online hmanga dilna thehlut an nih thu leh, an zingah hnam dang an tam thu an sawi a, "Online application-ah hian ILP demand a ni lo a, Mizoram páwn aṭang pawha dil mai theih a nih avangin hnam dangte'n an hmang ṭankai niin kan hria," an ti a; online registration bikah Mizoram sorkar a fimkhur lo hlea an hriat thu an sawi.

1.    Aizawl Central Zone    -     65

2.    Aizawl North Zone    -     120

3.    Aizawl South Zone    -     48

4.    Lunglei Zone    -     45

5.    Siaha Zone    -     9

6.    Kolasib Zone    -     33

7.    Mamit Zone    -     6

8.    Lawngtlai Zone    -     38

9.    Serchhip Zone    -     3

    Total registration    -     367

1.    Lawngtlai Zone    -     49

2.    Champhai Zone    -     3

3.    Lunglei Zone    -     37

4.    Range-I (Aizawl)    -     265

5.    Range-II (Aizawl)    -     89

    Total registration    -     443

    GRAND TOTAL    -     810