Sorkar hmasain hmasawnna hna a thawh tawh Páwngpaw hnualsuat kan tum lo - Dr Thangtea
Health & Family Welfare minister Dr R Lalthangliana chuan nimin khan MIMER a tlawh a, an mamawh leh tihchangtlun dan turte a enfiah. Dr R Lalthangliana chuan, sorkar hmasawnna hna thawh tawh pawngpaw hnualsuat an tum loh thu a sawi.
Dr R Lalthangliana chuan, tun hma aṭanga a lo awh rûk ṭhin medical college a tak ram a chang chu lawmawm a tih thu sawiin, "Tumah sawisel ka tum lo a, sorkar hmasa pawh khan theihtawp an chhuah a ni. Mahse, felfai taka ti turin an hun neihin a zir lo a, enfiah ngai neuh neuh chu a awm hmel. Medical college ṭha tak nei turin theihtawp chhuah zel a ni ang," a ti.
MIMER chu society anga kalpui a nih chungchang pawh an sawiho tawh tih sawiin Health Minister chuan, "Society anga kalpui mek a ni a, hei hi a ṭha em tih ngaihtuah a ngai. A ngaihtuahtu tur kan din dawn a, medical college hi college ṭha tak a nih dan tur an ngaihtuah dawn a ni," a ti a; medical college-in fund a hmuh zel dan tur pawh ngaihtuah a ṭul thu a sawi.
Dr R Lalthangliana chuan, State Referral Hospital chuan hmanrua chu a nei ṭha thawkhata a hriat thu sawiin, "Hmanrua lama inthuam ṭhat zel bakah hmanrua kan neihte a enkawltu tur ngaihtuah fel tur a la awm nual dawn. Kan awmna hmun hi a hlat deuh avangin hnam dang mithiamte an rawn thawh duhna atan an chenna hmun hma ṭhate ngaihtuahsak an ṭul," a ti.
Health Minister hian MIMER bakah Mizoram College of Nursing hmunhma hrang hrangte a fang kual a, an mamawh leh harsatna an neihte a enfiah a, a ṭul anga hmalak a nih tur thu a sawi.
Health Minister ṭawiawmtu MLA Dr ZR Thiamsanga chuan, hnam dang doctor ṭhate an thawh duhna atan chuan insawizawina hmun ṭha siamsak an ṭul thu a sawi a; hei hi Health Minister chuan a ṭul anga buaipui turin Health department hotute a hrilh nghal a ni.