National Voters Day hman a ni

Nimin khan Mizoram hmun hrang hrangah National Voters Day 2019 hman a ni a, Aizawlah chuan Vanapa Hall-ah Governor Kummanam Rajasekharan hoa hman a ni.

Larsap chuan, khua leh tui, vote nei tawh zinga kum naupang zawkte'n phûr taka vote an thlak theihna turin National Voters' Day hi India ram pumah hman a nih thu a sawi a, "Voter-te pawimawhna zau zawka inzirtir nan 'No voter is to be left behind' tih thupuia hmanga zirlaite leh mipui zingah nasa taka inzirtirna kalpui a ni hi a lawmawm hle," a ti.

SVEEP kalpui avangin nasa takin voter-te'n an chanvo bakah election kaihhnawiha an mawhphurhna leh an tih turte an hriat chian phah tih sawiin Larsap chuan, "India ram inthlan dan chu ram dangte ngaihsan leh entawn - inthlan dan thianghlim leh langtlang a ni," a ti a; inthlanna thianghlim a awm theihna atana thawktu sorkar hnathawk, MPF, YMA leh kohhran mite chunga a lawm­thu a sawi.

Governor chuan, MLA inthlan hnuhnung berah a ṭum khatna atan voter-te'n an vote thlakna an chian nawn theihna VVPAT hman a nih thu sawiin, "Tun inthlan hnuhnung bera hlawhtlinna langsar tak pakhat chu polling station zawng zawngah pianphung­ah rualbanlote'n vote an thlak theihna tura wheelchair nawr kai theihna siam vek kha a ni," a ti.

Larsap hian Voters' Helpline phone no. 1950 leh pianphunga rualbanlote hman tangkai tur mobile application-te a tlangzarh a ni.

Chief electoral officer (CEO) Ashish Kundra pawhin thu sawiin, hlawhtling takin MLA inthlan kalpui a nih thu a sawi a, "YMA, MHIP, MUP, zirlai pawl, kohhran, mipui vantlang leh a bik takin Mizo People's Forum chungah ka lawm hle. Electronic voting machine hi a rintlak tawk a, rin thua lo sawisel hi thil ṭul lo tak a ni," a ti.

Kuminah Lok Sabha inthlan a awm dawn tih sawiin CEO chuan, "He hunah hian vote nei thei chin la nei ve lote'n vote an thlak theih nan vote nei theite chuan vote neih a ranglamin an dil a ngai tawh a ni," a ti a; Lok Sabha election hmachhawn turin ECI chu kawng tinrengah a inpeih vek tawh thu a sawi.

Inkhawmah hian MLA inthlan neih zawh taka hnathawk ṭha fâl lawmpuina MPF leh Kanhmun Branch YMA hnenah hlan a ni a, voter upa ber Rochhinga (108), Zemawbawk chu lawmman leh certifcate hlan a ni bawk.