Lunglei MJA-in conference an hmang

Mizoram Journalists' Association (MJA), Lunglei district chuan nimin khan Mizoram Polytechnic seminar hall-ah Annual Conference vawi 13-na an hmang a, Lunglei High Powered Committee vice chairman Lawmawma Tochhawng, MLA khuallian a ni a, Lunglei district MJA member-te tana siam press card a tlangzarh.

Lunglei district MJA conference hi vice president Lalrintluanga Khiangte-in a kaihruai a; Lawmawma Tochhawng chuan, a ṭha lote hnâwl ngam a ngaih tuh leh chutiang atan chuan MJA-te nen an thawhho zel a pawimawh thu sawiin, "MJA-in mamawh a neih pawhin rawn thlen ula, kan tih theih chin tâwkah chuan kan tlanchhe lo ang," a ti.

Lawmawma Tochhawng chuan, "Lunglei HPC sum hmangin Lunglei mipuite'n eizawnna nghêlnghet an neih theih nan kalpui tum a ni a, chutah chuan MJA-te pawh an tel a, ṭangkai takin HPC sum hi hman a ni dawn," a ti a; venpui an ngaihnaah venpui zel turin MJA-te a sawm a ni.

Lunglei MJA conference-ah hian an president H Lalthansanga leh Lungleia IPRO C Lalremruati te pawhin thu an sawi.

1.    Lunglei District MJA ngenna ngai pawimawha MJA Gen. Hqrs.-in convention a neih ṭhin palzûtin block level aṭanga MJA member min lak luhsak avangin MJA Gen. Hqrs. chungah lawmthu kan sawi.

2.    Lunglei District hmasawnna atana pawimawh tur Kawrpuichhuah Border Trade a puitlin thuai theihna turin Mizoram sorkarin chak takin hma min laksak rawh se.

3.    Lunglei khawpui traffic tâwt lutuk tihziaawmna turin Lunglei by-pass road sorkarin min siamsak thuai rawh se.