MLA-in police quarters enfiah

Lawngtlai East bialtu MLA H Biakzauva chuan nimin zing khan Lawng­tlaia police quarters-te a tlawh a, an dinhmun a enfiah. MLA hi police hotute leh khawtlang hruaitute'n an lo dawngsawng a ni.

H Biakzauva chuan, ram leh khawtlang him nana chhun zan zawma rim taka hna thawktute chenna atana sorkarin quarters a pek Lawngtlaia mi chu a hluia a chhiat lutuk tawh avangin luah zel tlak nia a hriat loh thu a sawi a, "Fûrpui lai phei chuan awmna tlak a nih loh avangin a theih anga ranga quarters ṭha zawk sak a nih theih nan Home Minister sawipui thuai ka tum," a ti.

Lawngtlai Police Station huam chhunga building 30 awmah pathum chu sak ṭhat ngai loa ngaih niin, chu'ng pathum zinga pahnih chu thawm ṭhat ngai tura ngaih a ni a, a bak quarters 25 chu sak ṭhat ngai vek tura ngaih a ni. Quarters sak ṭhat ngaia ngaihte hi assam type building vek a ni a, kum 1978-a sak an ni deuh vek a, building pahnih chu luah ngam a nih tawh loh avangin ṭhiah a ni tawh.