KHAWTHLIR

The Citizenship (Amendment) Bill 2016 chungchangah January 29, Thawhlehni khian India hmarchhaka regional party hrang hrang hruaitute chu Guwahati-ah CAB an duh lohna resolution siam turin an inhmukhawm dawn a, chief minister Zoramthanga pawh a tel dawn nia thu dawn a ni. Intawhkhawmnaah hian CAB duh lohna thu an pass hnuah Prime Minister hnenah thlen an tum a ni.

ICFAI University, Mizoram chuan nimin khan an campus-ah blood donation camp an huaihawt a, Aizawl Civil Hospital tan mipa 79 leh hmeichhia 37-te'n thisen unit 116 an pe. ṬKP, Lungsen Bial pawhin nimin khan Lungsenah Christian Hospital, Serkawn tan thisen unit 50 an pe a, a petute mipa 33 leh hmeichhia 17 an ni.

Nizan khan Kristian Ṭhalai Pawl (KṬP) bial conference ṭan a ni. KṬP pastor bial conference hi pastor bial tinah a ruala hman tur a ni a, rokhawlhna vanga hmang thei rih lo, sawn hlá erawh tlem azawng an awm. Vawiinah rorel inkhawm neih a ni ang a, naktuk Pathianni zanah a ṭiak ang.

PRISM party chuan thuchhuah siamin, chief minister Zoramthanga thusawi an dem thu an tarlang a; "CM-in 'A fatu chan, a kawchhung leh a pumpui tláng chhahte chu awm tur a ni,' a tih hi eirûk a tum thu a puanna leh a kaihhruai sorkarin dan kalha induhsakna kalpui an tumzia a puannaah kan ngai a, kan dem hle a ni," an ti. 

Pachhunga University College (PUC) zirlaite chuan nimin khan an college-ah MLA inthlan neih zawh taka an college-a thawk lai MLA atana thlan tlin mi panga - Dr R Lalthangliana, Lalchamliana, L Thangmawia, Dr Vanlalthlana leh Dr Vanlalṭanpuia te an chawimawi.

Mizoram sorkar chuan tun hnai khan Parking House Committee a din a, chairman chu Chief Minister niin, secretary chu UDPA Secretary a ni. Member dangte chu - UDPA Minister, Aizawl Mayor, Finance Secretary, DGP leh PWD Engineer-in-Chief te an ni.