Mizoram chhungah Covid-19 inkaichhawng an la awm loa hriat a ni - Health Minister
Health minister Dr R Lalthangliana chuan nimin khan thuchah ti chhuakin, Mizoram chhungah Covid-19 inkaichhawng kan la awm lo nia hriat a nih thu a sawi a, "Vawiina result kan hmuh thar ber sample 15 result pawh a vaiin a negative vek a ni. A lawmawm hle, kan ṭawngṭaina rah a ni," a ti.
Covid-19 Testing Laboratory nei turin nasa taka beih a nih thu sawiin Dr R Lalthangliana chuan, "March 23 khan laboratory pual hian Core Committee din a ni. Laboratory nei tur hian Central sorkar leh ICMR nen indawr reng a ni.
Rokhawlhna engemaw mtak a awm loh chuan rei loteah Mizoramah ngei Covid 19 testna khawl kan neih ve theih ngei a beiseiawm," a ti a, laboratory neih theihna atan hian kan MLA helama mithiam bik te, PUC Principal leh an mithiam bik te, MZU, CAU Selesih, ZMC, RIPANS lam mithiamte an thawhhlawk thu a sawi.
Health Minister chuan Covid-19 Strategy and Comprehensive Action Plan (short-term and long-term) felfai tak, scenario hrang hrang ngaihtuah chunga kan hmachhawn dan tur siam a nih tur thu sawiin, "Lockdown hi hlih a nih hunah pawh kan him tlan nan mamawh thilah doctor-te rawn nan telemedicine hman ṭangkai tur a ni. Health & Wellness Centres (HWC) programme hnuaiah PHC/CHC a doctor-te training pek vek tawh an ni a, mipuiten ngaihven ang u.
Sub-centre aṭangin kan Health & Wellness Officer-te telemedicine hmangin rawn sak theih an ni ang," a ti.
Dr R Lalthangliana chuan sorkar laipuiah mamawhte thlen zel a nih thu sawiin, "Union Health Minister-ah DO letter leh phone hmangtein bawhzui reng a ni. Kan Chief Ministerin theih tawpin hma min lakpui reng a, kan Minister dangten an department ṭheuhah nasa takin hma an la a ni. Kan MLA leh AMC councillor te pawh an ṭang hle. Kan MP pahnihte pawhin theih tawpin hma an la a, ka lawm hle a ni," a ti a, Covid-19 dona atana pawisa hman mai tur mamawh ngawih ngawih laia anmahni duhthu ngeia thil petute chungah an lawm takzet thu a sawi.
HEALTH MINISTER THUSAWI DANG ṬHENKHAT :
• Kan hriat theih chinah Airport a khualzinte screening ti hmasa ber state kan niin kan hria.
• Lockdown kan zawm ṭha. India ramah a zawm ṭha ber state kan ni hial awm e.
• Local task force kan nei ṭha a, an zarah buai lutuk loin kan awm thei rih zel a ni.
• Tun kan dinhmunah hian Vairengte lam aṭanga lo luhnaah hian super strict-a kan inven chuan he hri lakah hian kan him theiin kan mithiamten an ngai deuh tawh hial a, eng emaw thleng palh thut erawh a la awm thei.
• Chhung tinte, kut fai taka sil fo tur leh ina tawm chhunzawm tlat turin ka chah nawn leh che u a, nasa zawka Pathian hnenah ṭawngṭai zel turin ka ngen nawn che u a ni
• Mipuite chiai lutuk lo turin ka chah nawn leh duh. A bik takin Falkawn leh Chhimphei tlangdung khuate, kan dam lo hi a enkawl tur bikte’n enkawlna tur hmun bik siamah him tak leh uluk takin an enkawl mek a, ZMC leh saw lam tlangdun tan hlauhawm tur a awm lo