Mipui tel loin Republic Day lawm a ni Hruaitu hmasate chibai i bûk ang u - Governor
January 26 khan Mizoram hmun hrang hrangah Republic Day vawi 70-na lawm a ni a, mahse, NGO Coordination Committee-in an boycott avangin mipui tel loa hman a ni. Governor chuan Republic Day thuchah sawiin, India ram leh hnam hruaitu hmasate chu hre reng a, zahna chibai bûk turin mipui a sáwm.
Republic Day (R-Day) lawmna pui ber, Lammuana neih chu zing dar 8-ah ṭan a ni a, Governor Kummanam Rajasekharan chuan hnam puanzar pawt pharhin, parade contingent a endik hnuah parade-te'n hnam puanzar chibai an bûk a chháng lêt.
Governor chuan, Mizoram mipuite chu R-Day chibai bûkin duhsakna a hlân a, kum 70 liam taah India ram chu mipui rorelna ram, danpui ropui tak hnuaiah dikna, mimal zalenna, intluktlânna leh inunaunate lungphûmah neiin 'Democratic republic' ram ni turin a inbâwl hrang ṭan tih a sawi a, "Tun dinhmun kan thlen theihna tura theihtawp lo chhuahtu India ram leh hnam hruaitu hmasate kha rilruah hre rengin zahna chibai i bûk ang u," a ti.
Kum 70 chhungin India ram chu khawvela mipui rorelna ram lian leh ropui ber pakhat a ni tih sawiin Larsap chuan, "Hnam hrang hrang, ze inang lo tak takte awm khawmna ram ni mah se, mipui inkara inlungrualna leh inpumkhatna chu khawvel mithmuhah chiang taka tarlanin a awm a ni," a ti a; ram changkang ni tura sorkar hmalakna leh mipui beiseina tihhlawhtlin chu thil pawimawh ber a ni tawh tih a sawi.
Kummanam Rajasekharan chuan, Mizorama inthlanpui hnuhnung bera hlawhtlinna chu sorkar hnathawkte inpekna leh mipui vantlang thlâwpna te, NGO leh kohhrante leh Mizo People’s Forum (MPF)-te inpekna leh thawhrimna vang a nih thu a sawi a; an chungah lawmthu a sawi a ni.
Larsap chuan Mizoram sorkar hmalakna te, hmachhawpte leh hlawhtlinnate a sawi lang a, "Ka sorkar chuan Mizoram hi mahni kutkea ding a, intodelh turin ruahmanna hrang hrangte siam a, chak taka kalpui a tum. Sorkar langtlang leh mawhphurhna la ngam, mipuite innghahna tlak sorkar ni turin theihtawp a chhuah dawn a ni," a ti.
Governor thusawi zingah - Lok Ayukta kalpui thuai tum a nih thu te, ram tana nun hlante hriat reng nan an chhungte chhawmdawlna tur ruahmanna a bika siam tum a nih thu te, Socio-Economic Development Policy (SEDP) chungchang te, dan leh thupek kenkawh ngaih pawimawh a nih dawn thu leh Mizoram Village Level Citizen Registration kalpui tum a nih thu te, Agriculture leh a kaihhnawih thila hmalakna tur te, kawlphetha, faina, blood processing fee, Health Care Scheme, zu leh ruihhlo do chungchang, zirna, infiamna lam, Act East Policy chungchangte a sawi lang bawk.
Aizawla R-Day lawmnaah hian parade contingent pakua an tel a, force mi (police leh sipai) vek niin, an zinga pathum chu band an ni. Parade-ah hian sikul naupangte pawh tel tura tih niin, lâmte pawh zir vek tawh mah se, NGO Coordination Committee (Joint NGO)-in R-Day an boycott avangin an tel phalsak a ni lo.
Chief minister Zoramthanga, sorkar hotu dangte leh Joint NGO hruaitute January 25, 2019 tlaia an inbiakrem angin, R-Day lawmnaah hian CM Zoramthanga, minister dangte leh MLA-te bakah, sorkar official-ah secretary chin leh R-Day lawmna huaihawttute an tel. Governor-in lawmman leh chawimawina hrang hrang a sem a ni.