NGO-te'n Republic Day an 'boycott'

The Citizenship (Amendment) Bill, 2016 dodalna vangin NGO Coordination Commi­ttee (Joint NGO) chuan January 26-a Republic Day lawmna chu Mizoram pumah an 'boycott' a; Aizawlah chuan R-Day lawmnaa tel turte dang turin YMA branch hrang hranga mi eng emaw zat an thawk chhuak.

Republic Day an boycott avang hian Joint NGO thuchhuak angin Aizawla YMA branch hrang hranga member-te chu Lammual chhehvela duty turin an thawk chhuak a; Lammual main gate-ah te, Ritz Hotel bul aṭanga luhna gate bulah leh Aizawl Dâk-inpui bulahte an duty a ni.

Thu dawn danin, Lammuala Republic Day lawmnaa kal tum an tam lo a, Joint NGO duty-te tan dan buai ngai an tam lo. Chutih rualin, R-Day lawmnaa tel thei tura Joint NGO-in an tih zinga mi nia inngaia tel tum, duty-te'n an dan tak erawh tlem azáwng an awm.

Mizoram Journalists' Association (MJA) Ge­neral Headquarters Vice President hoin chan­chinbu mi ṭhenkhatte pawh Joint NGO duty-te'n Lammual gate bulah an dang a; anni erawh hi chu dang tluan loin, a hnu-ah Lammualah luhtir an ni.