District hrang hrangah Republic Day pualin hnam puanzar pawh pharh a ni

NGO Coordination Committee (Joint NGO)-te'n The Citizenship (Amendment) Bill, 2016 duh loh lantirna atan Republic Day an boycott avangin Aizawl tih loh district khawpui dang leh khaw dangahte mipui náwlpui huapin R-Day hman a ni lo a, district bawrhsapte leh an aiawhte'n DC an pisa tualah hnam puanzar erawh an pawt pharh thung.

Lungleiah chuan DC pisa tualah additional DC Benjamin Lalzama'n hnam puanzar a pawt pharh a, official-te'n National Anthem an sa rual a; chu bak R-Day programme a awm lo. Siahaah chuan bawrhsap Harleen Kaur-i'n hnam puanzar pawt pharhin, zahna chibai a bûk a; Kolasib-ah pawh bawhsap Dr Arun T-a'n hnam puanzar a pawt pharh a, hnam hla sakho a nih hnuah inkhawm tihtawp a ni.

Republic Day lawmna atan hian Lawng­tlaiah chuan DC pisa tualah bawrhsap N Chakhai-a'n hnam puanzar a pawt pharh a, Lawngtlai SP Amit Goel chuan general salute hmanga hnam puanzar chibai bûk a chháng lêt.

Champhaiah pawh bawrhsap Dr Naveen Aggarwal-i'n hnam puanzar a pawt pharh a; DC chuan R-Day chu India Constitution duan chhuaha hman a nih hriatrengna atana hman a nih thu sawiin, "India danpui duang chhuaktu pu BR Ambedkar hi a hnathawh ropui tak avanga hriatreng a pawimawh," a ti.

Dr Naveen Aggarwal chuan, sorkarin mipui hmakhua ngaiin hamṭhatna hrang hrang a chhawpchuah ṭhin thu sawiin, "Chu'ng zingah chuan ration te, mirethei in sakna, terrace, tuikawng, ni za inhlawhna leh a dang dangte awmin sorkar thar pawhin chak taka hmalak chhunzawm  zel a tum a ni," a ti a; mipuite chu sorkar aṭanga ṭanpuina leh hamṭhatna chauh beisei loa mahni kutke a din tum ṭhin turin a chah.

District hrang hrangah hian ruahman lâwk dan chuan Republic Day pual hian khelmualah mipui náwlpui huapa hun hman tur a ni a, parade contingent-te pawh awm tura tih an ni. Mahse, NGO-te'n an boycott avangin ruahman angin Republic Day hman a ni lo.